মা ( চাকমা কবিতা )

0
48

মা

আলোময় চাকমা

মা তর হোচপানা ;
গরঙর তবনা।
হদক ভাবনা ভাবীলুঙ ;
সাল্লেঙান ন’ পেলুঙ,
হাল্লোই দিম্ তুলোনা।
সেনে মর এজ’ ন’ অয় ;
মা, তরে নিনে হোবিদে লেঘানা।

যুনি এক্কা ছেরান পাং ;
হাদিমাস্যা পুনংচান্,
ত’ ধাগত থোই চাং।
পুনংচানান সাদেচ্যা লাগে,
যেদক চেদুঙ ছাদ্ ফিরেপাগে।
ঈধোত উদিলে মা ত’ মুয়ান।

অ’সায়র অঝার পিত্থীমি ;
যা চেলুঙ্ রিনিভিনি।
ভারীদ’ ; হম্বা পারাহ্!
সিয়ত ন’ আবুজে বিস্বেস্।
সিয়ত ন’ বানে বুক।
সিয়ত ন’ জুরোয় পরান।
ভাবীলে বেক্কুন সাদাঙা,
মা, ত’ হরবো ছাড়া।

যক্ক-রক্ক, কুবের ধন ;
অদ’ নয় এক্কুই সং,
বানাহ্ তর এক ফুদো দুধো সান্।
পিত্থীমির বেক হুজীর আঝি ;
এগত্তরে আজিপুঝি,
সিয়েনিতও তোগে ন’ পাং,
মা তর মিধে আঝিয়ান।

পিত্থীমির বেক মেইয়াঁআনি ;
যুনিও হুরে আনি।
তলেলুঙ মা তর হোচপানা।
মা, তুই বানাহ্ তল্লোই তুলোনা।
সেনে মর ন’ অল’……
মা, তরে নিনে হোবিদে লেঘানা।।।

০১/০৮/২০১৫

LEAVE A REPLY

Please enter your comment!
Please enter your name here