মানুচ্ !!! ( চাকমা কবিতা )

0
26

মানুচ্ !!!

আলোময় চাকমা

বিল্ডিংয়ো দেবালঅ চেরেত্তুন্..
চুলিফিরি পারর ভিলি,
মানুচ্ হোলাস্।
ন’ পারির চুলি,ভাঙাঁ ঘর ভিলি।
মানুচ্ দ’ আমারে ন’ মোলাস্।
আমা কিয়েত্ হাদাস্যা বাচ্!
হায় গেলে বাচ্ পাহছ্।
পধে-ঘাদে মাধেলে…..
ইজ্জোদ্ যায় ভেলে।
চোঘো লেজে রিনি চাস্ ;
যিদ্দুর পারচ্ দুরোত্ থাচ্।
ডাঙর মানুচ্ হোলাস্!!!

কয় আঝার ইদে তর বিল্ডিং ঘর ;
পত্তেক্ ইদত্ এক্ ফুদো ঘাম্ ধর।
সে লগে সিমেন্ট করোলি ;
গাজ্-বাজর জোড়াতালি।
ইজেব গুরিচ্,
বিবেক্ যুনি থায় তর।
সে ঘামানি আমনর।
আমারে মানুচ্ ন’ ভাবর।।।

এক্ সাজ্ ন’ খাচ্ ছধ্যা ছাড়া ;
চিগোন্ চোল্ কাড়াত্তুন্ কাড়া।
তর সে ছধ্যা কন্যাঁ জুগোর?
ভুইয়ে-জুমে রোদ্-ঝড় কন্যাঁ মুয়োর?
ওলোনশালর আগুনানি কন্যাঁ ফুয়োর?
যার কবাল’ ঘাম্ ঠেঙত্ ন’ পলে,
তর বাবুয়ানা হাক্কন্ ন’ চলে।
তারে তুই অ’মানুচ্ কলে ;
মানুচ্ কবং কারে,
ভাবীলোচ্ গমেদালে।।।

আগাজত্তুন্ ন’ পড়ে তর উড়োন্-পিনোন্।
ভাবীবার সময় ন’ পর এদক্ ভীলোন্।
শুনি থাক্ তরে হং…..
এক্কুই মানুচ্ এক্কুই সং।
তারা আগন্ উত্যাফুত্যা ;
জারহালত্ জার হেই।
কিয়েত্ কি আগে খবর নেই।
সুধোবীজি জুমোত্ কুজি ;
ছুলিকাদি জুমোত্ পুঝি।
বাচ্চে থাদন্ ফুদোদোক্ ফুদোদোক্।
কাদিমাস্ ঝড় উদোক্ উদোক্।
দীঘোল দিন্ মাস্ বিদিনেই,
সে সুধো তুলিনেই।
মেশিনোত্ কাবর বানেই,
ইচ্চা দোলা সাজর!
ক’, নিজরে কম্বা ভাবর???

২৪/০৭/২০১৫

LEAVE A REPLY

Please enter your comment!
Please enter your name here