হোচ্ পাঙ্ ভিলিনে (চাকমা কবিতা)

0
40

 হোচ্ পাঙ্ ভিলিনে

আলোময় চাকমা

পেদেবে ন’ পেদেবে, সে তোক্কিত্ ন’ লোলুঙ্।
পেদেলে পেদে পারচ্।
যুদি ন’ পেদাচ্—
তিনাঙ্ ফালাঙ্ উভোলফাল্!
উড়োম্বা আ হত্তাল্!
ঠিয়িনীঁ ছিনা আ পিজেদি ঘিলা!
আমন’ দুক্যান্ কালা মিলা।

হোচ্যা রাঙাঁ দাদা তত্তেই,
থেম্বিছিয়া হামাক্কায়।
সাজুন্যাঁ মাধান্, লাজদর্ ভুদিবানি!
ছেচুঁক ছেচুঁক গুজি গুজি হানি হানি।
ত’ সাঙুদোরত্ আবুজি।

বেন্-সুধো হাম্ ন’ জানঙ্ ;
বাগ’ হামও ন’ পারঙ্ ;
মা-বাপ্ যুদি মুরি গেলে–
চিগোন্ গুরো ভেইয়ে মোক্ ললে,
থেমবোই মুই হা আজায়।

ভেইপুত্ বায়িজায় হ’দা দিবাক্!
সংসমাজ্যায় আঝিবাক্!
নয় নাকদি মোত্তুঙগোই!
নয় ত’ সাঙুদোরত্ —-
আবুজি থেদুংগি হামাক্কায়।

লক্ষীপুদি চিজিপুদি তারা ;
বো যেই পুয়ো পেই ছাড়া।
হা আজায় আগঙ্,
দিনে-রেদে ভাবঙ্।
মিলে জীংকানি মর্,
বুবো স্ববন্ দেগং।

মর্ আওজ্ জের’ আজা,
ফিরে ন’ দিবে হামাক্কায় মরে,
যুদি হানি হানি রেত্ নীজি–
তর্ মজা ঘরর্ পিজুম্ বাজ্ ধুরি,
সাঙুদোরত্ থাংগি আবুজি।

তুলি ললেদ’ ললে—
যুদি ফিরে দিলে ;
সে ভাবনানি ভাবী চাঙ্।
অকুল্ ভাবনাত্ সাজুরি কুল্ ন’ পাঙ্।
এই ভাবনাত্ তুই সমার্ অবে,
জীংকানির্ গঙাঁর্ দোজ্যান্ পার্ গুরি দিবে।

এই ভাবনানি মনত্ জুবি জুবি,
রেত্ নীজি সাঙুদোরত্ চুবি চুবি ;
শুনঙ্ ন’ শুনঙ্ হানিম্মি গুজি গুজি।
আজা আগে রাঙাঁ দা —
তুই জুচ্ জুচ্ গুরি এনে,
দিবে মরে চোখ্কুন্ পুজি।

চুবেচুবে এনে যুদি ডাগচ্ছি মরে ;
হবে—লাঙোঁনী হন্যাঁ মাজ্জে তরে???
হাত্তুন্ হি শুঞোঁচ্???
চিত্ পুড়িলে হ’দে মরে।
এদক্কি রেদো মায়!
হুদু যর্ গায় গায়???

মর্ হোনো জোব্ নেই ;
ছেচুঁক ছেচুঁক গুরিনেই —
আমাদি ভাঝে বুজে দিম্ ;
হোচ্যা রাঙাঁ দা তরে —
হোচ্ পাঙ্ ভিলিনে।।।

০৬/০১/২০১৫

LEAVE A REPLY

Please enter your comment!
Please enter your name here