icon

হেশ হুমোরী (চাকমা ছোটগল্প) -শেষ পর্ব

Pollan

Last updated May 12th, 2020 icon 71

• ৬
রাজলক্ষ্মীর তিন-মায়-ঝি’র গিরিত্তি দোলে দালে-ই হাদের।হেশ হুমোরিলোই তারা জুম বেড়ান্নোয়।বানা তারা নয়,তেঙ-তেঙরি, পত্তাপত্তি,সত্তাপেক, সে লগে দভা হাদি ভিরেজ্চু সমার বদন তারা লগে জুম বেড়ানাত্।এহল্ জুম’র লাঙেলে২ বেড়েলে ফাত্তো বেড়ান্যে জুম’ তুম্বাসচানি নাগত্ সমে।ইদোত্ উদে রাজলক্ষ্মীর এক জুম ভরণ তার স্ববণানি।
এক্কানা হেই-থেই পাল্লে, আগ’ ধারানে গমে থেলে মান্নো চোগোত্ উদনা এ সংসারর্ সুধোম(রীতি)।বানা মানেয় নয়, সংসার’র পুক-জুক্কুন উ চোগপিজি রেনি চান এন অক্তত্।


সেদিন্নে হেশ হুমোরী চুধো-মু গরি লুংঙেগি লেত্তো দাগি ঘরত্।হেশ হুমোরিলোই তা মা’র ইঙিল্যা এক্কা মন’-মালিন্নো চলের।আদামর নানাক্কান সোমাচ্যা লাঘত্ পায়, গম ভান্যে ভালোক্কানি শিঘে তে, তা মা তারে মানা গরে, শিঘেদ চায়,শাসন গত্ত চায়।সেত্তে তা মা উগুরে তে এক্কা মন’দুখ বানি আগে হয়েকদিন অল।তুঅ, তা মা বেজ অসুখ হিনে তা মা হোইনে ভেদা দে এ পেয়ি লেত্তো দাগিদু।ত মা’রে বেন্নি হিয়ে হামাচ্চোন, উদি নবারের,পরি আগে ছটপদার হোইনে লেত্তো-মা পোরানান্ ভিরুঙ২ গরের, ছোত্পোত্তে ওই উদিলো লেত্তো-আবেয়ু । দোলে হোই ন জানে হেশ হুমোরী সেত্তে তারার এক্কা বেজ গরি মনত্ হামেরেল’।নানাক্কান বিজুঙ-বাজাঙ আন্দাজ্ মনত্ উদের পরের। তরাতাঙচ্চে গরি গেলাক রাজলক্ষ্মী দাগিদু।
তারা মনে২ জিয়েন হোয়োন সিয়েনরই লক্ষ্মণ পেলাক্কোই। রাজলক্ষ্মী ঘরত্ পরি আঘে,ছটপদার, তা মা বিজোন বিজি দের হানি২। বুঝিবার হিচ্ছু নেই আর রাজলক্ষ্মী রে লদিয়ে বেড়েয়ি।আদাম্মে হয়েকজন থুবেয়োন্দি ভেদ্ পেনে।হিয়জনে হামত্থুন ফিত্তে২ ভেদ্ পেনে উদিজ গরা এচ্চোন।


অক্তবু আলে যেয়ি লেত্তো-আব’র বুঝদে দেরি ন অহল’।তুঅ আদাম’ বৈদ্যগুনোরে হোঝা দি পাদেল’।বৈদ্য এলাক ঝারি চেলাক, পরি চেলাক তারায়ু আঝা আহরেলাক।তুঅ তারা জোঘা চেই যাদন,পারন্নি হন’ রাঘেই।
আদাম্মে-পাড়াল্লে থুবেয়ন।নাঙ বাজেয়্যা পন্ডিত্থুন লুংঙোন্দি।নানা জনে নানাক্কান বুদ্ধি নিগিলেই সাদন।হিয়জনে দুষ তোগাদন।হুন্নিত্থুন জানি একজনে হোই উদিল’ “ রাজলক্ষ্মী আর’ক্কা ঝাদি হবর দিদো।“ আর’ একজনে হল’ “ঘর’ হুরে গিরি আগন সিগুনোরে দ হোই পাত্ত।হন্ বেন্নে বিলি হাম’র হেয়ি।“ হয়েকজনে চুবে চুবে হোলাক “আহ্ হায় হুরে মানুষচুন্নোইয়ু বিলি বেজেরা-বিজিরি আর’ হুত্তুন। সেদিন্নে বিলি হক্কেঙ্যা দাগি গরুগুনে তা জুমোত্ চচ্চোন্নোই সেন্নোই হক্কেঙ্যালোই এক্কা হোধা টানাটানি ওয়ি বিলি।” সে হোধা শুনি পুরোনো হোধা ইদোত্ উদিনে,”ইমম..সিন্নে দেক্কোঙ দ রাজলক্ষ্মী রে, হিঝেহিচ্চ্যা গরি জুম’ মেক্কে যাত্তে, বেল্লে দিবোরত্।গরু ভিলি এচোন্নে জুমোত।সিগুন সালে হক্ক্যঙ্যা গরুগুন ওভাক্কে।“ হল’ পান হিলিক ইক্কো চাবেই২ আঙুলো মাধাত্ সিবুদি গরি ইক্কো মিলে।এক্কা রহ্ বদলি অন্য মিলেগুনো মেক্কে গরি হল তে, যে অহ্দ’ শাদ্ হায় হুরে মানুচ্চুন যে লাগন বুঝ’ নি,বিপদে-আপদে।বেন্নে বিলি হামর হেয়ি,হক্কেঙ্যা দাগি দ সেক্কে হামত্ ন যান ইবুল।সেক্কে যুদি তারারে হদ’ আর’ ঝাদি ভেদ্ পা গেলুন।”


বৈদ্যগুনে দারু তোগা বাঝে দিলাক।হয়েকজনে লামিলাক দারু তোগা।সে লগে লামিলু লেত্তোয়ু তা সংসমাচ্চেলোই । তারা দ ন সিনিদাক হাজে তুঅ গেলে দ হন’ ভান্নে হিচ্চু ন অর।
ননাবি দাগিয়ু লুংঙোন্দি ভেদ পেনে।মানেয়ুন এক্কা লাঘা লাঘা ওলাক । হেশ হুমোরি এক্কান জাগাত্ বোই আগে মহ্ঙচামু গরি। তে মন’ হুজি চিনিলেয়ু মন’ দুগ এঝ দোলে ন চিনে, এঝ’ সে অক্ত ন অয়।হালিক,হিঝু২ মন’ দুগ বানি থোই জানে তে।তা-মা উগুরে তে ঠিক সেয়ান্নে মন’ দুগ বানি থোয়ি।তে ন চিনে এঝ’ দোলে জনম-মরণ।মানেয় মরি গেলে ফেরত্ ন এঝন আর, সিয়েনু তে ভাবি নবারে এঝ’। সেত্তে তে এঝ’ তা মা উগুরে এক্কা বেজার,আগত্থুন এক্কা হমিলেয়ু, তা মা-ত্যে তার মনান গলিলেয়ু। হি গরিবু তে বুঝি নবারের।গরিবারু বা হি আগে তার হানানা ছাড়া।সালে হি তে হানিবু? না! হানায়ু দ নজায়।তা মাত্থুন মের হেনে,পিরে পেনে হানি এচ্চেদে তে এ যাবৎ,মন’ দুঘে দ হানি ন এঝে! হেয়ান্নে গরি হানন্নে মন’ দুগ পেলে? এয়ান্নে গরি তে মনে২ চিদে গরি২ আগে।ননাবি দেগিনে হেশ হুমোরিরে পিঝের গল্লো “ হেশ হুমোরি! বেন্নে ভাত হেয়োচ মা-মা?”
“না-দে”
-“যেই আমা ইদু ভাত হেয়োই”
হেশ হুমোরি এক্কা ইঞ্জিব অহল।মনত্ তার হিচ্ছু এক্কান উদের পরের,এনে দ বেন্নেত্থুন ধরি ভাত ন হায় তে।তুঅ, তা মা অসুখ,তা-মায়ু দ ভাত্ ন হায় তা বেবে ন হায়।তে হিঙিরি হেবগোই গায়২।ইক্কে তা মা উগুরে বান্নে রাগকান নেই আর হলে সোই।মনে২ বুঝি পাচ্চে তে দাঙর হিচ্ছু অহব।তুঅ তে বিশ্বেস ন যায় হিচ্ছু অহব বিলি।


হাক্কন থেনে ননাবি আর’ হল’ “হুমোরী! যেই মা”
সিয়েন শুনি লেত্তো-আবে দাবা হাদে২ হল’ “ যা ভাত হেই আয়োই হেশ হুমোরি।“ লেত্তো-মা রে হল’ “লেত্তো মা আহ জেধে রে (রাজলক্ষ্মী মাব’রে)দিবে ভাত আনি দেগোই না তুইয়ো ঘরত্থুন।“
দারু তোগেয়ে একদাগি, দারু ধরি২ এত্তন্নোই।হেশ হুমোরিলোই ননাবি যাদন লাঙেল বেই।এহল জুমোন ফেলেই যাদন লাঙেলে২। আদিক্কে গরি হেশ হুমোরী মহ্ অহল পদ’ সংভাগত্।“হোন্না দাগিলো তারে?!”
ননাবি আক্কল২ যাল্লোই হেশ হুমোরীলোই হধা হোই২।ভেদ্ নপায় তে হেশ হুমোরী আদ্ধান’ত্ বাঝি আগে।
“নাহ্! অহলে যেন-পায় হি শুন্নোঙ্গে” হেশ হুমোরী মনে২ হল’। আর’ আহ্দা ধরিল’ ননাবি পিঝে২, লাঙেল’ পদে। মরণ হি এঝ’ তে ন চিনে, সেয়ান্নে গরি-ই গেলগোই। মনে২ এঝ’ হর তা মা গম অহব।
শুনো গেল হেশ হুমোরী রে তার বাব’ হুলেন্দি আত্মীয়গুনে তারা সিদু নেজেবাক ভিলি।তা বোরোঙাবোই নাদিন্নো ইরি নবারে। নাদিন্নোলোই ফারক অহনাগান মানি নবারের তে।চোগো পানি চেরাং চেরাং ওয়ি বিলি সেয়ান্নে বুড়ো মান্নে। সে হধাগান আদাম্মে নাদিন দেক্কে,পুদোবো দেক্কে বয়চ্ছে মিলেগুনো হধালোই আর’ বেজ্ চিপ্পুরে পারা গরি ফুদি উদিলো।

“থুম”

ছবিটি এঁকেছেনঃ জওয়াং রাখাইন

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

Pollan

Contributor

Follow Pollan

One thought on “হেশ হুমোরী (চাকমা ছোটগল্প) -শেষ পর্ব

Leave a Reply

Your email address will not be published. Required fields are marked *