ঈদোঘর ( চাকমা কবিতা )

0
32

ঈদোঘর

আলোময় চাকমা


ক’বুয়া হুরিলে ঈদোত্ অয়।
চোঘোত্ ভাজে বৈজেখ্যে এদিনত্।
ঘামে ভিজি বুরি যেই,
কামে কামে নিজেস্ লবার ছের নেই।
তুও মিধে আঝি ন’ হরে তর মুয়ানত্।
ঈদোত্ আঘেনি তর?
সে ধেবো, যে বজর….
তর-মর পত্থম্ দেঘা, দোগিন্ ধাক্যা জুমানত্?

মোনো ওভোলা তমা ঘর ;
এভেলাদি জুম হিয়োগি যে বজর।
ঠিক্ এ মাধান্, বৈজেখ্যে হরানত্।
হন্ কামে ঈদোত্ নেই!
একপাগে তমা জুমত্ যেই।
বানাহ্ তর মিধে আঝিবো,
এব’ ফুদি আঘে পরানত্।

এ হধা, সে হধা, হদক্ হধা…..
আঙিঁয়ে ভোঙিঁয়ে হধানি ফুরেই এলে…..
যুনি হং, হধে পরান্ কারে হোচ্ পাহচ্?
এয়োঁ নেই! চোয়োঁ নেই!
চুচ্যাঙ্ তাগলান্ থুউরিত্ থগ্ দিনেই।
বানাহ্ আঝি আঝি চে থাহচ্।

তর দ্বি চোঘোত্ থক্ চেদুং।
তর মনর আমাদি ভাচচানি মাধেদুং।
থক্ও ন’ পাং, উদ’ও ন’ পাং।
মাত্তর ইয়ান্ পাত্তুঙ্ হোই,
মা পিত্থিমী বুগোত্ বোই।
আগত্তুন্ পিত্থিমীয়েন্ ভজান্, ভজান্ হোচপাং।

অগ’লককো ডগরে তা আহলে।
জুমবলায় ধান্ হুজোন্ তালে তালে।
হন্যাঁ হবর লর, ম’ মনানে হি জবে?
ঈদোত্ অয় তার-মর।
দোগিন্ ধাক্যা জুমঘর।
রংধঙর জুনোপহর্….
আহ, বেড়িয়েই হদক্ জুম চাবে চাবে!!!


০২.০৫.২০১৭

LEAVE A REPLY

Please enter your comment!
Please enter your name here