আগ সজপদর – ( চাকমা কবিতা )

0
44

আগ সজপদর

আলোময় চাকমা


পুর লামে লামে ন’ থেচআর,
আর’ ঘুরেবে হয় বজর।
যত্তন গোরি তত্তে ভিলি,
জুগোলে থোইয়ং আগমুলি।
এলে হামাক্কায় দেঘিবেগি,
চিত জুরোয় পারা ফুল কাপ্যা,
হদক্কানিই বুনোহাদার সজপদর।

হাদি মাস্যা গাজ-বাজ পুঘে ন’ হান,
অক্তমোজিম কাবি থোইদ্যং তাগলক।
বেনোসুজি, রদংবাজ, ছুচ্ছেকবাজ,
ফুলো বিয়োং তাম্মোবাজ।
রানি সেয়েং, ব’হাদি, তেরাম, থুরচুমো।
পুদি পুদি তুলি থোইদ্যং আগলত।

মুলি বাজচোই বুনিদ্যং বেনো ভেড়া,
ঠেঙাঁনি দি দ্যং গলালোই।
গমেও ন’ জানং বুনি,
ত্যুও পারিবে আনা, ফুনি,
মুমদলা, সুধোত্তুম, নানাক্কান পঝা থোই।
যুনি দোল ন’ দেলে ফেজগোরি ন’ দিচ্ছি পরান তর মিধে মুয়ান্দোই।

সুধোন্নুলি ভত্তে আর’ হবেচ্যে সুধো ভুরিবার,
আহ, ভুলোঙাঁনি হোই!
পুঘে ন’ হান পারা,
আন্নোয় ন’ ধরে পারা,
এলে দেবেগি, বনা বাঞ্যেঁ ধুমোউজু
চগলা সমত দ্যংগি, হনালেত্য থোই।

হধে চাং, ফুল চাবুগী তুলদে,
কেনে ফিবোলোক গোরিবে সুধোনাল?
ন’ ভাবীচ,
কুদুক পেইয়েই গেল বজর,
কুদুক কাদা রাঘে দ্যং এক গজর।
আর’ বিরবিচ্যে গোরি চাঝি থোই দ্যং সিবেং কাদা,
জুম কাবদে ইক্কো পেনেই গবঅ আড়।

বড়ঙাঁ আমলর তাচ্ছি চাম।
মামাও কারবার ন’ গরেআর বুড়ো ওই।
কদম গাজঅ দুরি দি,
ঘনঅ পাগে আধেদি।
তাচ্ছিদুরি বুদি থোই দ্যং, চেচ্ছি…
সে তাচ্ছি চামান লোই পারিবে,
হনঅ পিড়ে পেদে নয় বেনত বোই।

উদি বজর রাজ পুন্যাহত যেনেই কিনি আঞ্যঁং,
নাকশা গাজর বিয়োঙান।
রাঙাঁ হাদিয়ান বুগোত বানি,
ধোই আনিবেগোই সজপদরানি।
নিজীনুজি তর আধে বুঞ্যাঁ,
ভারী ধাপ, মাধাত বানিবের মর হবঙাঁন।


মডেলঃ স্বস্তি ২৯/০১/২০১৮

LEAVE A REPLY

Please enter your comment!
Please enter your name here