মিলেছ’ বাবর নিয়েলজি ভাবনা ( চাকমা কবিতা )

0
50

 

মিলেছ’ বাবর নিয়েলজি ভাবনা

আলোময় চাকমা


উরঘুমো ঘুমোত্তুন্ আদেক্যা গুরি জাগি,
মিলেছ’ বাবে ভাবের ভাবনা ;
ইক্কে আমি হুধু আঘি?
জাগাত্ তিন্ চুলুম্ ধুন্দো হেই,
ন’ পারিল’ ঘুম্ যেই।
ন’ মাধি, ন’ বুলি……
বানাহ্ আঘে রিনি চে,
কেনে উদের চেরাগর ছ’ কালি!

ভধঙ’ উজু দনদমা কত্তমান্ কালা ওল্!
ছরবুদি আন্নোয়ানি কদক্কানি ঝুড়িপোল্!
এক্ আধ্ সিধেন্ দিই,
এক্ আধ্ কবাল’ উজু!
বড় ছড়া থুমর মিলেছ’ বাবে,
হোন্ডে ন’ পাচ্যে সংসারর কধা ভাবে!

সিধেসিধি দুখকামী তে,
লাম্বা লেকচার, রাজনীতি ফাজনীতি ন’ বুঝে।
টানিলেও তা বাধি নাক্কো তার লাম্বা ন’ অব’,
ডিঙিঁত্ ডুবিলেও যে এ্যেরানি এগত্তর অধ’ নয়,
ইয়েনি তে দোলে দালে বুঝে।

জে এস এস অত্ত’ তে হবর ন’ পায়।
পেনেই অ’ তার কি লাভ।
তে চিনে শান্দিবাহিনী। জাদর লুড়ো,
পাচ্ আত্যের বান্ধা সোনা মানেক্কুন্!
ভালক্ বজর আগে,
যেক্কে বড় ছড়া থুমোত্ ব্যেরাক্ এল’।
তা’ ঘরান্ ও পি বানেওন্।
অকতত্ বে অকতত্ কদ’ মানজ্যোরে,
রাহনি-বাহরি খাবেয়্যে।

মিলেছ’ মারে আমিজে বোঝায়,
যে ভেইয়ুনে মা-বোন্ ছারি,
আগন্দি পরানান্ এককুরে গুরি।
আমি যুনি তারারে
ন’ রাগেই আড়ে আড়ে।
তারা হুদু থেবাক্?
ও তারা কাত্যেয় মত্তন্ কধে?

জুমোর পাগানা চিন্দ্রা, মাম্রা ;
বাবুদাগি খে পেলাক্ না ন’ পেলাক্।
বড় বাবুবো কমলে এব’ চে…….
নুয়ো ধানর ভাত্ আক্ গুরি ;
ভালকদিন্ অল’ চোল্ চারিত্ পুড়ি।
খেদং,আনুনি-নুনজো, লাদাপাদা……
ইক্কে এ্যবল্ ঈদোত্ উদের কদ’ কধা!

জেত্ মাস্যার পাগানা রোদ্,
আজারর ঘুর বারিজাত্।
মাঘর সন্ মজ্যা জারত্!
উতারা এত্তন্ ক’লে……..
কন্ পঝা কুনদি থোই,
চুধো চুধো পরানান্দোই।
ঝাড়্-জঙল্ মোয়েঁ ধাবা দেনা!
কদক্ রেত্ ঘুম্ নেই,
কদক্ ছাজ্ উবোস্ থানা!

পানি সাজে ধুরিলে,
কলাগাজর বুগুলিক্ চাবে চাবে,
এলুনি হেলুনি উদো ন’ পিয়া,
নুও সুদিন্ মাধানর কধা ভাবানা!
যেদিঞ্যাঁ বানাহ্ আমি আমি।
এ দেজত্ রাজা! এদেজত্ প্রজা!
খেবার দেবার চিদে নেই,
হোচ্ পা পিই বেগে মিলিঝুলি দলামজা!

এন্ অকতত্ মিলেছ’ মায় ডাগে…..
যিয়ন্দোই যিয়ন্ দ ই ই ঈ….
র’ শুনি ভাবনার রেজ্যত্তুন্ ফিরে মিলেছ’ বাবে।
রিনি চায়, পেঠ্ লেহলেচ্যা!
কদক্ খেব’ বড়াগুলো রস্ চাবে চাবে।

মিলেছ’ মার এদক্ ভাবনার লালচ্ নেই!
সুঘোর কধাও ন’ ভাবে,
দুঘোর্ কধাও ন’ ভাবে।
তে ভাবে বে অকতত্ রাহনি-বাহরি খাবানা আ,
ঢেব’ থেব’ দিনুন্ কমলে ফুরেবাক্!

ঘর পুড়ি গেল্! ছত্র সাঙ্গ ওল্!
নুও গুরি সাজে তুলি হুমবিক্ ন’ খেই।
মরন্ ভেই মারন্!
মায় মারের নেনাহ্ বাবে মারের!
সেদুক্যা মের খেই এল’ দ্বি-এক্ বার।
বুক্ চিগুত্! ধাক্ চিগুত্! অহদ্ উয়ে,
চবাশালত্ নেজেবার!

চুক্তি ওল্। শান্দিচুক্তি ভেলে!
চের দপা নে পাচ্ দপা,
মিলেছ’ বাবে উদিজ্ ন’ পায়।
আন্দাজে উদিজ্ গুরি হিয়েচ্ গরে,
এবারত্ যুনি সুদিন্ মাধান্ ন’ এজে…
সালে আর এধ’ নয়!!!

এজ’ তার ভেরাক্ ভেরাক্ মনত্ আঘে,
চুক্তি ওই বাবুদাগিলোই ফারক্ অদে….
চেরাং চেরাং চোঘোপানি!
তুও, ডাঙঁর এক্কান্ আঝা এল’…
এবার দেঘাযোক্ সালে,
বাজারত্ গেলে বুচ্যা আঙুলো মাধালোই,
নাক্ অজল্, বুগোপাদালোই,
বেড়েম্মোই কিয়ে ধুলে ধুলে।

বাজারত্ ন’ অলেও খালহুলে,
এক্কান্ দোল্ ঘর বানেম্।
সেক্কে মিলেছ’ মারে কোম্,
দেঘছ……
মর কধানি ধত্তেদ’ তর কিয়া পিড়া গরে!
এই সুক্কানি কাত্যে???
মিলেছ’ মা মু চিমে চিমে আঝিব’।
চিগোন্ নাদিন্নো মুজুঙোঁত্ ফালুক্ ফালুক্ নাজিব’।
এ স্ববনানি পালেল’ ভালক্ বজর।
চিগিৎসা অভাবে সে নাদিন্নো মুরি যিয়ে!
কদক্ বেক্কুনোর ননিয়ে, আওজর!

ইক্কে আগ’ বল্ নেই, আগ’ আওচ্ও নেই।
চাহদে চাদে উনিশচো বজর বিদি গেল্।
উদিজ্ ন’ পিয়া নানাগান্ কধা শুনে।
তে ন’ বুঝে ইউপিডিএফ হন্যাঁ!
তে ন’ বুঝে জেএসএস হন্যাঁ!
তে ন’ বুঝে সংস্কার হন্যাঁ!
বানাহ্ ভাবে,
এন্ অকতত্ ত’ তে ইদু থেবার কধা নয়!
বিল্ডিং ন’ অলেও বাত্তি মাজ্যে,
কারেন্ড’ পহরত্ থেবার কধা।
কুত্তুন্ কি ওল্, কোই ন’ পাজ্যে।
ওলোত্ পালোত্ গদা!

তে ইক্কে ভাবে শান্দিচুক্তি কাত্যে?
“পেজা হুল্ হুলোয়,”
” হোড়োল্যা সনাত্তুক্ পায়”।
আ ন’ অলে আমা নাঙেঁ কুরোপিড়ে এচ্যে পারা।
তারায় আমিজে বিঝুত্ বেড়ান্ পারা।
বাঙাঁমোচ্যে পিজেন্দি বুগি,
আন’লে আজা আচ্যা গুরি,
মোবাইলত্ গান্ শুনি শুনি,
হুরোহুজ্যে গুরি।

চোঘ্ তন্ তনায় পা, আদামে আদামে,
ননিয়ে ননিয়ে কধা কোই কোই।
তারা ভিলে বেগর বন্ধু…..
সুঘে-দুগে বিপদত্ পলে….
তারা ইদু যেবার কন্।
আধ্ বাভে হেণ্ডসিপ গুরি “দোস্ত” ডাগন্।

রাদায় ডাককারের,
নাদিন্নো ছন্দভাচ্ মাধের।
পহর অয়।
মিলেছ’ বাবর ভাবনানি থুম্ ন’ অয়।
চেরাগকো তেলান্ ফুরোয়!
মিলেছ’ বাবে ভাবের চে ভাবের,
যে ভাবনাত্ সাল্লেঙ্ নেই।
যে ভাবনানিত্ বঃনিঝাস্, ধুন্দুক্, গুলু..জি…
দুগ্ আঘে সুঘ্ নেই!!!


২১/১০/২০১৬ইং

চুক্তির উনোজ বজর পুর্তি মুজুঙোঁত্ রাগেই “কুরুম” দ্বি পোইদ্যেত্তে (২য় প্রকাশনাত্তে) মর নকভাজ গুচ্ছে (নির্বাচিত) কবিতা।

LEAVE A REPLY

Please enter your comment!
Please enter your name here