সংসার (চাকমা কবিতা)

0
30

সংসার

আলোময় চাকমা


ও মন্ যেদক্ দ্যুঙ্ সজ্ ইরি,
ঘুরি বেড়াস্ উড়ি উড়ি,
বেড়ে চা যেক্কন্ পারর লুড়িচুড়ি।
যেক্কে বেড়েবে লুদিধুরি,
ম’ হধানী মনত্ তুলিচ্, ফিরিফিরি।
যুদি আওজ্ থেলে।
সংসার হি? হদে চাঙ্।
গমে বুজিলে।

যারে ভাবর সদর ভিলি,
জীংকানি গঙর মিলিঝুলি।
তেহ্ যেক্কে তরে দিব’ দুরোত্ ঠিলি,
আবিলেশ্ হে হে ডাগিলে —
পরান্ ফেলেফেলে।
বুজিবে সেক্কে ——
সংসার্ হি!
হদে চাঙ্ গমে বুজিলে।

ভাবদে ভাবদে জীংকানি গেল্।
ঘর সংসার্ ছারানাদা ওল্।
যা এলে গমে এলে,
আর’ বেশ্ পেবার চেলে,
হি পেলে? হি দেলে?
যা এল’ সিয়ানও আরেলে।
সংসার্ হি?
হদে চাঙ্ গমে বুজিলে।

হা হধা হন্যাঁ শুনে।
যার যে মন্ জনে জনে।
যার যে দগে বুজি মনে মনে।
হা হবর হন্যাঁ রাগায়,
সুগে ওক্ দুগে ওক্ আগায় আগায়।
ভাবী চেস্ এ হধানী,
সোচত্য ভিলি জানিলে।
সংসার্ হি?
হদে চাঙ্ গমে বুজিলে।

যেদক্ থেবার চাস্ আওজ্ গুরি।
যেই পেবে একদিন্ সংসার ছাড়ি।
হন্যাঁ যেব’ ত’ লগে?
ভাপ্যুচ নি গমেদালে?
ও মন্ বুজি শুনি চল্।
গম্-ভাঞ্যেঁ দ্বিয়ান্ নাঙ্।
যিয়ান্ মনে হয় সিয়ান্ থাঙ্।
ও অবুঝ্ মন্–
সংসার্ হি?
হদে চাঙ্ গমে বুজিলে।
২১/১২/২০১৪

LEAVE A REPLY

Please enter your comment!
Please enter your name here