জিংহানির লামা ( চাকমা কবিতা )

0
24

জিংহানির লামা

আলোময় চাকমা


চোঘোত্ ভাজীনে হি অব’,
মনর চরততো বাহজের।
মাধানর গঙাঁরত্ আড়ে গেল্
ঈধোঘরর সাত্ দোজ্যে।
ন’ ভাজের তর-মর,
বিদিযিয়া জিংহানির পুন্নিমা-আঙুঁচ্যে!
.
নিধুকতুক্ জিংহানি সপ্পানত্।
পেলাংবিয়া হোচপানা এল’ আমিজে।
জিংহানি গঙাঁদে, পরানানি তরাদে,
ছহলচাদ্ গুরি হাদেয়েই দিন্ মাধান্।
সুখ্ বাদে দুঘ্
তর-মর গা’ত্ ন’ বাহজে।
.
সুঘো সাদায় ঘেরেং বাঞ্যাঁ হিয়েনিত্,
লেম্বে ন’ পারে দুঘোর আগুনে।
ডেমেলাক্ ডেমেলুক্, বিজোল্ ফিজোল্,
নিবিলির পত্থানি মোঞেঁয়েই আঙুঁচ্যেত্,
উচ্ছো ফুচ্ছোই আধে আধ্ ধুরিনে।
.
গেলাকও বিদি ভালক্ বজর।
মকতবা উয়ে ঈধোঘর।
চোঘোত্ ভাজিলে সুঞ্জুক্ ফুদে মনানত্।
রিপরিপ পিজেদি মেলে যাদন্ সে দিনুন্,
ন’ এবাক্ আর ডাগিলে।
.
এক্কা এক্কা চোঘোত্ ভাজী হি অব’
শুঘে যিয়ে মনর দোজ্যে,
হেনে ফিরি এবাক্ সে দিনুন্,
এত্তে ছহলাত্ মনর চরত্ বাহজিলে!


০৫/০৭/২০১৬

LEAVE A REPLY

Please enter your comment!
Please enter your name here