icon

তেহ্ হি অইয়ে! (চাকমা কবিতা)

Jumjournal Admin

Last updated Jan 7th, 2020 icon 127

তেহ্ হি অইয়ে!

আলোময় চাকমা 


চিল্ চাদারাত্ খবঙ্ উড়েই দিই–
মানে হুলোর দুগোর সাগরত্তুন্ লুকদ্যা–
শিব্ চরন্ অই ন’ পারি,
তেহ্ হি অইয়ে?

যুদিও তার গোজেন’ লামা ধক্ গুরি,
আর ন’ পারিবঙ্ রজে।
সাহলে হি অলর গুরি থেবঙ্?

এজ’ বেগে, তার গোজেন্ত্তুন্ চেইয়া বরানি,
ছিদি দিই মানেই হুলোত্।
ন’ থোক্ হিংসে, পিজুম্,
ন’ থোক্, মারামারি, ভারাভারি।
দেজত্ পেলাঙ্ বেই যোক্, সুখ্ আর সুখ্।

বেক্ পরান্ বলারে হোচ্ পিয়া,
এ যুগোর মহাপুরুষ বনভান্তে অই ন’ পারি তেহ্ হি অইয়ে?
এজ’ বেগে তার দেগেদ্যা পদে আহধি যেই,
ন’ থোক্ আর মনর হুলুক্।
বেক্ পরান্ বলায় পাদোক্ বাজিবের–
পিত্থীমিত্ এক্কান্ দোল্ ঠিগিনা।

নিজোর বেক্ সুখ্কানী জাদল্যাই উবোদ্ গুরি ঢালিদ্যা,
জাদর দুখ্যা মানজ্যর দুখ্কানী ভাক্ লোইয়া,
ঠিদির ঠাদার জাদর আড়-বাশঁ,
জাদর মুক্তিল্যাই বুগোর লো দান্ গুরিয়া–
মানবেন্দ্র নারায়ন লারমা —
অই ন’ পারি তেহ্ হি অইয়ে?

এজ’ বেগে জাদর এই অদিন্ মাধানত্,
ধরাধোজ্যে গুরি সুদিন্ মাধান্ ফুদেই তুলি।

চেরোপালা বানা, ব’নিজাস্! ধুন্দুক্!
হদক্ আর মা-বোনর শুনিবঙ্ আবিলাচ্!
দেগিবঙ্ হদক্ আর চোগো পানি।

মনত তুলিবার চেই, লারমার হধানী,
তেহ্ হোই যিয়ে –“ক্ষেমা গর’ ভুলি য'”
তার হধা বিচ্চেস্ গুরি,
জাদল্যাই, দেজল্যাই এক্ জধা অই,
জাদ্ বাজোক্, দেজ্ বাজোক্ —
বাজোদোক্ দেজর পরা হবাল্যা দুখ্যা মা-বাপ।

হি ঘুর বারিজা, হি দাঙ্ দাঙ্যা পাগানা রোদ্!
শন্ মজ্যা জারত্ দুখ্কাম গুরি–
এক্ লেজা হন’ সুগর ঘুম্ যেই পান্নি।

বুগোত্ আগুন্ গরম্ আগুনো আহভা খেই–
মামা রাঞ্যাঁ, দুগোর ভাত্ গরাস্, আ—
মুড়ো তলাত্তুন্ বেবে আঞ্যাঁ পানি এক ধার–
এই জুম্মো জাত্তো সুগে খেই পাননি।

রন্জিত্ দেবানর ধক গান গেই ন’ পারি,
তেহ্ হি অইয়ে?
এজনা বেবে জাদর গানুন শুনি শুনি,
সুগর ভাবনা রেজ্যত্ ভাজি যেই।
হোচ্ পেবার শিঘি জাদর গীত্তুন্।

ত’ দক্ মুই ন’ ওম্, ম’ ধক্ তুই ন’ অবে,
এজনা যা ধগে তেহ্ জাদরে, দেজরে
হোচ্ পেবার শিঘি।
আর’ শিঘি, ভালেদ’ স্ববন দেগিবের,
যে স্ববনান্ আমা জুম্মো দেশ্চান্–
ফুল্ বাগানে ফল বাগানে,
পত্তাপুত্তি ভঙরায়, ভুরি উধিবো—
চিগোন সোনা চিজির আজিঁ
হলক্ হলগে…….।।।


১৯/১২/২০১৪

Share:
জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

Jumjournal Admin

Administrator

Follow Jumjournal Admin

Leave a Reply

Your email address will not be published. Required fields are marked *