হাজলঙ’ পাড়ে পাড়ে… (চাকমা কবিতা )

0
26

হাজলঙ’ পাড়ে পাড়ে…

আলোময় চাকমা


“লোগাং ছড়া হুলে হুলে হন্ গাবুরি এজেত্তে,
হরত্ তার ইক্কো হুম্ এক্কা এক্কা আঝেত্তে…
এক্কা এক্কা আঝেত্ত

লোগাং, সেঙেঁ, মিয়োনী, হাজলঙ’ পাড়ে পাড়ে,
নেই দ’, গাবুরি ইক্কে আর বেড়েও ন’ পারে।
হন্ হু হেনত্ হুত্তুন্ দ্বিঠেঙ্যাঁ বাঘ্ উড়ি এই,
হিলহিলেলাক্ আদাম্ দিঘোলি,
বোজোত্তি দিলাক্ ন’ মাধি ন’ বুলি।
হধে চাং…….
আঝিবো নেনাহ্ হানিবো?
হেনে থেব’ গাবুরি!
আমিজে পধে-ঘাদে, ঝাড়ে-জঙলে,
দ্বিঠেঙ্যাঁ বাঘকুনে থান্ আহগুরি।

যে জাগানিত্, যে গাঙাঁনিত্,
সুখ্ বানী মনানিত্,
উচ্ছোফুচ্ছোই বেড়িয়ে জুনো পহরে পহরে।
ধেই যিয়ে বেক্ সুখ্,
ইক্কে তার ঘরত্ও ন’ বানে বুক্,
ঝাক্ বুদি থেলেও সমারে।

আদাম্ থিয়া জুরেয়ন্,
হুনহুনোনি ফুরেয়ন্।
সেনে ফুরেয়ন্ গাবুরির দোল্ আঝি,
ফিরেপাগে রিনি চ’,
রিনি চেলে দেঘিবা,
শুঘেযিয়া চোঘোপানি, গাবুরির গালচাবাত্
হেনে হিঙোঁরি আঘে বাজী।

এবার বোদোলি যোক্ গান্,
গাবুরির দুঘো আঝি সমারে,
এজ’ গেই বেক্কুনে,
নুওগীত্ নুওগুরি সংজয়ারে।

“লোগাং ছড়া হুলে হুলে হন্ গাবুরি এজেত্তে,
আধত্ তার ইক্কো….এবার ইজু মাধেত্তে…
……এবার ইজু মাধেত্তে…. “


১০/০৬/২০১৬

LEAVE A REPLY

Please enter your comment!
Please enter your name here