আঝার বজর পরে ( চাকমা কবিতা )

0
29

আঝার বজর পরে

আলোময় চাকমা


আঝার বজর পরে,
যেক্কে ন’ থেবং তুই-মুই…..
থেবাক পিত্থিমীত্ তর-মর
ফেলেযিয়া যের’ তম্বাউন্।
হি নাঙ্ লোবাক, হি নাঙ্ দিবাক,
ভাবরনি, হি ওই পারে???

হেন্ মাধানর গঙাঁরত্ ভাজি যাদে,
তর-মর এ জাদর বিজক্কানি,
ধনপুদির মন’ হধা…
চান্দোবীর চোঘোপানি!
পারিবাকনি? না ন’ পারিবাক।
ধুরিরাগে যুগে যুগে।

যুনি এন্ অয়…..
আঝার বজর পরে,
পিত্থিমীর মানেয়র বিজক ঘাদদে।
হোনো এক কম্পিউটারর হার্ডডিক্সত্,
হোনো সফট ফাইলত্,
ন’লে হোনো এক যাদুঘরর আনা ভিদিরে,
ভোরে থুয়ে চিগোন্ মেমোরিত্।

ন’লে ইন্টারনেদর ডাটা সংকেদত্,
সুমুরি থুয়ে ক্লাউড স্টোরেজত্।
পা গেল পিত্থিমীত্ ইক্কো জাত্ এল্।
আঝার বজর আগে যার বজত্তি,
হাদে যিয়ন্ পিত্থী পিত্থী।
যারার রাজা এল’,
দোল এক্কান্ দেজ এল’।
মাত্তর, গুজ নেই উজ নেই।
গুঙিয়োন্ দিনুন্ যা ধগে তে গুরিনেই।
ইক্কে মাজারা আঘে হিজু ছড়া গাঙ্,
“চাঙমা” ভেলে সে জাত্তোর নাঙ!!!


০৬/০২/২০১৬

LEAVE A REPLY

Please enter your comment!
Please enter your name here