সালেন কি গেস্যেক তারাহ্ জিদিলাক – চাকমা কবিতা

0
43

সালেন কি গেস্যেক তারাহ্ জিদিলাক

মেয়েরেগা


দচ্ নভেম্বর উনেচ স তিরাজি জাদ’ এহ্’রা খেবার লালোঝে
একপাল ইয়েং-দেইন ধারাধারা লেত্তো ফেলেই
তরে তাক দি গঝক গরিলাক আহ্জার বঝরর সুঞ্ঝুক।
বিজগর ধেলা পাগোর ছিনেকুদো অহ্’ল’ অনালে
ধারাধারা লো আহ্দি গেল’ নাল বেঈ
যে নাল এঝ’ আহ্দের আজিরেন জুম্ম দেঝর ছরা গাঙে।
ত বুগোর উমুম লো ঝরঝরেই ভিজেই গেল চাদিগাঙ
সে লোর্ ভাপ উরের এঝ’ পুরুংপুরুং গরি
লো খেয়্যে ছিজি-মাংসা ভঙদন এঝ’ সিন্ধেবাচ্ চুঃমি
মুরো দেঝত ফেলেই যেয়ে তর সাগেরেত একতাল-
তারাহ্’রে মালুম ভাঙা বানেবার সিউনে তকতগাদন।
‘ফারক গরি সাসন গর’ এ তালিগে খজেনেই
নাককাঝি ফারবান ছিনে অঃল’ বাচপাদা
ঝরা ঝরা ওঃয় গেল’ সিক কেইম ভাঙি।
এচ্যে কয় বঝর বিদি গেল’ কবালর লেঘা ন ধ বদলিল’
পোরা ধরা খেই খেই জাগামাদি বেক আঃরেই
নাধারত পরি গেল’ জাদর গিরিত্থি,
দেইন-ইয়েঙর জয়গীত আঃ জিত্ত্যেবাবদা
ঘরর মূরখামত গাঝা ওঃইয়ে নারদ দেবেদা,
বেলগর খাত্তোঙান অঝারত্তুন অঝার অঃর
জনম অঃর জিদঘিন নেইয়ে ভঝা মানেয়র;
সাকমরা গুলোসান দবাংসা আল্যেগত
সুওত-সাদ্ ছারা চবা জেদেনা
বানা উগোর ছলঙান লাগে তরুনো
ভিদিরে ভিদিরে বেক্খান ঝগলা ঝগলা।
সালেন কি গেস্যেক তারাহ্ জিদিলাক
লো চুজোনি দেইন-ইয়েঙে বজত্তি বজেলাক!
সালেন কি যদেবদে আমি ওধিলোং
বুকপাদা দেঘানাত গুচ্ ঊরি লাংথা অঃলং।

10/11/2017, সুক্কোরবার

LEAVE A REPLY

Please enter your comment!
Please enter your name here