icon

বিঝু তুই এবে ভিলিনে  (চাকমা কবিতা )

Jumjournal Admin

Last updated Jan 6th, 2020 icon 117

 বিঝু তুই এবে ভিলিনে

আলোময় চাকমা


গাজে গাজে নানান্ ফুল্ ;
নানান্ পেগোগীত্।
দগিনো আহবা ছড়ান্ পিয়ে ;
দেবাকালা ইত্তুক্ ইত্তুক্ ঝড় ;
ঝিমিলানি জিরেননিয়া।
অ’লেনব’ কুয়ো পড়ে ;
ঝড় ঠিগেলে জার গরে।
গাবুর্ লগর গুদুখারা ;
গাবুরী দাগির ফুলছড়া।
চিগোন্ চিজি আমিজে নাঙ্ ঘিনে ;
বিঝু তুই এবে ভিলিনে।।।

নুয়ো নুয়ো ছিলুম্ ;
পিজিছড়া, কানবাঝা।
কুদু কুদু বেড়েবার
সয়সাগর মন্ আঝা।
আনিবে বিনিভাত্ ঘাত্যে ;
এবে পিধে মজালোই।
গাবুরে ফুদেবাক্ রোনবাজি, হাবোই ;
ইন্দি উন্দি হুই হোই।।
মিধে জঙঁরার কুম্ মাধাত্ গুরি ;
তুই এবে উড়ি উড়ি।
সেনে চিজি নাঙ্ ঘিনে,
বিঝু তুই এবে ভিলিনে।।।

জিদেজিত্যা কোগিল’ র’ ;
চত্তিদগানত্ গ’ গ’,
তুঙলোপুদি দাগি।
মামা রানের জঙঁরা ;
ভুজি যিয়ে চোল্ কারা ;
পহঁত্যা ঘুমোত্তুন্ জাগি।
চিজি মনান্ খুজি খুজি ;
জুর বাঙুরী পেইনে।
আমিজে তরে নাঙ্ ঘিনে ;
বিঝু, তুই এবে ভিলিনে।।।

করদ্ উত্তে লেলমপাদা ;
লজা লজা পারাঙাঁ আগা।
চিগোন্ ছড়ান্ উয়ে,
ছাগা উরে ছাগা।
ন’ মিলন্ মাছ্-হাঙাঁড়া ;
বেবে যিয়ে তোনতোগা।
লগে যিয়ন্ সংসমাজ্যা ;
তোগেবাক্ কাত্তোল্ ডিঙিঁ,
সেঙেঁতারা ছড়া পাড়ত্।
কুইয়াঙ্ আলু তাত্ আলু ;
দুরোর নিবিলি ঝাড়ত্।।
বাজেবাক্ জিদেজিত্যা ;
কা পাজনান্ অয়
কয় পদ দিনে।
এ জায়জুগোল্…..
বিঝু তুই এবে ভিলিনে।।।

নুয়ো সাঙুঁ বানেল’ বাবা ;
ইজোরান্ টুনের দাধা।
পোল্ দের কেদাকতুক্।
রিনি চাহর ফিরি ফিরি ;
জগা চাহর উরী উরী,
ফুল্যাঙ্-হাদ্দোঙ্ উজুকচুক্।
চোলুন্ ওয়ালে পত্তন্দোই কিজেনী ;
লুজ্জে নাহি ডিঙিঁহিলে ঘাজুনি।
নুয়ো ভার্বারী বদলী ;
লিবি পুজি রাগিয়ো।
কিল্লে-পরশু বিঝু এলে ;
আজের থেদ’ নয় ডিঙিঁবো।
এ জায়জুগোল্ সেনে ;
আ নাগুরী তেউচ্যা নাঙ্ ঘিনে ;
বিঝু তুই এবে ভিলিনে।।।

বাবা ন’ পারের আগ’ ধক্ চুলি ;
নিরিতিত্যে জীংকানি!
অভাবপান্ লগে সঙ্গি।
বিঝু বাজার ধুরিব’ ভিলি ;
নীঝি থয় পা রাগেয়ে,
ঘুচ্যা-সুধো এক্ মণ্ তুলি।
ভালকদিন্ ধুরি আগে ;
ওজোলেঙ’ পধ’ ধাগে,
কক্রেবুয়াত্ গুরিনে।
বেগর আওজর ইক্কোদিন্,
বিঝু তুই এবে ভিলিনে।।।


১১/০৪/২০১৫

Share:
প্রসঙ্গঃ
জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

Jumjournal Admin

Administrator

Follow Jumjournal Admin

Leave a Reply

Your email address will not be published. Required fields are marked *