এলাফেলা জীংকানি (চাকমা কবিতা )

0
34

 এলাফেলা জীংকানি

আলোময় চাকমা


দুরোর বে বামত্,
পুরি আগঙ্ অনালত্।
যিধু নেই ডিঙিঁহিলা র’,
নেই ম’ নাঙেঁ এক্ ফুন্ ব’!
সিধু আগঙ্ মূই ;
গভীন্ তারুম্ ঝাড়ত্!!!
অশীজি ; কূভাজে!
রিপরিপ্ ক’বুয়া কুরি যার ;
ভদে চাঙ্ ; ছিনধে চাঙ্ ;
থান্ ন’ পাঙ্! সন্ নেই!
মর এ মাধান্ ;
ভজান্ আকুলোত্!!!

রাধামন্ সেনাপতি নেই ম’ লগে ;
নেই জলগাঞ্জা বুনিয়ে ধনপুদি।
সৈঞ্যঁ নেই ; সামন্ত নেই ;
টারেঙ্, রিজেঙত্ আবর হে আগঙ্,
যুদ্ধোত্ ঊধি!!!

ম’ কানত্, বাজে সপ্পানত্ ;
কাতকাত্যা কেতকেত্যা র’!
নীঝি রেদোত্ বিরেজর্
গুজি গুজি কানুনী!
সংসার যুদ্ধোত্,
মো’ মিত্ পিঠ্ বাজেইয়া ;
ইক্কো বন্দা মূই,
বানাহ্ গঙাঁঙঁর এলাফেলা জীংকানি!!!


০৫/০৪/২০১৫

LEAVE A REPLY

Please enter your comment!
Please enter your name here