খাচ্যত (চাকমা কবিতা)

0
71

 

 খাচ্যত

আলোময় চাকমা


এন্ পাদারা মুই……….!
ভিজে পেগত্ উন্দুরো হুচ্ দেগি,
বাঘ’ হুচ্ মনে গরঙ্!
ধেভ’-থেভ’ দিনোত্……
পিত্থীমি তেবাত্ ধুধুগ’ ছেড়ে,
যুনি একঝাক্ পাদারায় লুগেথান্,
মুই সিয়ত্ হামাক্কায় আগঙ্।

যুনি মুই ইক্কো……
বেরেনি কলেজ’ পো ;
বেকজনে, প্রফেসারে মরে কোচপান্।
দেজ্ জাদল্যাই মিশিল মিটিঙ্ কলে!
সেক্কে মর,
B.C.S অর চিদে মাধাত্ ঘুরে।
সিত্তুন্ মুই আঝার বাশ্ দুরে।
দোগান’ ভিদিরে পোল্লে থাঙ্।

বারে এক্ ছাপ্, ভিদিরে এক্ ছাপ,
উগুরে উগুরে ভেল্ মারি।
দেজ্-জাদ’ কামে মর….
নিত্য ধাক্ পিড়ে, পেঠ্ পিড়ে!
নানাগান্ সুধোলোয় ছাড়ি যাঙ্।

আর যুনি অঙ্ মুই………
সরকারি ওমা চেলা!
এম্বা চাগুরি কয় জনর থায়!
গরানাও কেনে এলাফেলা।
দেজ্-জাদ্ কধা চুলোয় যাক্!
চাগুরি আগে বাজা পোরিব’ নাহি????
যে যে কবারলাক্ কধোক্,
কান্ পাদিবের মর দরকার নেহি!!!
সরকাজ্যা কধানিত্ মর,
শিরে তিগুত্ তিগুত্।
কধায় কধায় আহিঁ…..আহিঁ……( জিঁ আজ্ঞেঁ)

আদামত্ যুনি অঙ্……
দাগর ওমা মাজন্!
পেদেরা-পেদোরী মর সুম্পুত্তি!
সুম্পুত্তির লালজে শুনাদ’ পরে,
ঘিনি দিধোক্ চোদ্দো গুত্তি!
এই অল’ জুম্মোর খাচ্যত্!
কবার চেলুঙ্ আগায় আগায়।
মাঞোঁ কধা কি কোম্…..
ম’ খাচ্যত্ত্যানলোই মিলেদে হামাক্কায়।

জিনি যার সুবিধাবাদ!
ভাজি যার দেজ্-জাদ্!
লুগে যার মর মাদ্!
আধে কুরির নিজ’ গাদ্।


১৩/০৩/২০১৫

LEAVE A REPLY

Please enter your comment!
Please enter your name here