দেবংসি (চাকমা কবিতা)

0
47

দেবংসি

ম্যাকলিন চাকমা


ব্যাগ ঈক্য ভাঙামুচ্যা, ঘাবে ধচ্যা লাম্বা পেন আ লাম্বা আধ’ সিলুম পিনি
সে-দিন্যা রাঙামাত্যা গাড়িত উত্তোঙ্;
বাস’ মানুচ্চুন চেয় এলাক
হালিক, ন-চিনন মরে।
মানিকছড়ি পার অধে, ভাড়া মাঘধে
হেল্পার-বু একমন্যা গুরি চেয়্ এ্যাল’
হালিক, ন-চিনে মরে।
যেক্কে গাড়িত্তুন লামিলুঙ্,
কালচার’ ইন্দি আহদি যাদে
দ্বি-জন মানুচ চেয় য়েলাক মরে,
তারাত্তুন পুঝোর গুরিলুঙ ননাধনরে;
দেগে দিলাক তা জুম-আন।
হালিক ঠিগ দি রিনি চেয়নেয়-ও
চিনি ন-পারিলাক মরে।
জু জু ননাধন ডাঙ্গু
হাঘারাছড়িত্তুন ফিরঙর এচ্যা
ঘরত ফিরদে উদিলুঙ ত-জুমত
ভাবিলুঙ আগমুলিন
তরে এক্কান সাম্বাদ দি যেবাত্যা।
দগে দাঘেহ্ রিনি চেয়
বঝিবের হল’
হালিক বেল উদোন্দিত মন উরগুন্যা অক্তত
তেও চিনি ন-পারিলহ্ মরে।
কালচার অত্তুন ফিরি
সিনএনজিত গুরি রিজেব বাজার যাদে সলাত
ম-দাগত বচ্যে চাঙমা-পুওবু রিনি চেল’ যদেপদে।
লাম্বা চুল, দাঁড়ি দাঁড়ি মু দেনেই
চিনি ন-পারিলহ্ মরে।
মারিশ্যা লঞ্চত গুরি সুভলঙ যাদে
দ্বি-জন বাঙালে দেনেই
চুবে চুবে হি হবুলো ঘরন হবারে।
অক্ত অক্ত রিনি চান ম-ইন্দি
হালিক তারাও চিনি ন-পারিলাক মরে।
আজারি বাগহ্ মাত্তো পার অদে
নিজেনির পাদাত
ডুবি যেয়ি রাজ ঘরান চেয় আগে
মরা গাঝ’ গুত্তেউন অক্ত অক্ত
পানিত ডুবি ডুবি চেয় তান
হালিক তুবলোর ঝলগানিত পরি ডুবদে ডুবদে
দোলে দালে চিনি ন-পারিলাক মরে।
সুভলঙ লামি সিলেক দাগ’ পহদন্দি ঘরত ফিরদে
চি-হারা হেলেয়ে হয়েকজন গুরো চেয় এলাক
রোদোত চেঙারা পুরি যেয়, তপ্পানর সম্ভাক পহদত
তারাও ন-চিনিলাক মরে।
সেক্কে বেল ডুবি যার, ঘরত ফিরঙর
এচ্যা, সত্তর-অ বঝর বিদি গেল্;
ফেলে যিয়ে চিগোন গজ্জঙ গাচ্চু ডাঙর অয়ে,
হালিক সে চন’ চিলেনি ঘরান এব’ আগে।
পার্বত্য চুক্তি
১৯৯৭ সালের ২রা ডিসেম্বর অস্ত্র জমা দিচ্ছেন শান্তিবাহিনীর সদস্যরা, ছবি: Pround To be a Jumma

LEAVE A REPLY

Please enter your comment!
Please enter your name here