icon

হিলোভিদিরে (চাকমা কবিতা )

Jumjournal

Last updated Jan 6th, 2020 icon 267

হিলোভিদিরে

আলোময় চাকমা

দাঙঁদাঙ্যাঁ চিদতান্ জুরেম্ ভিলি,
তিরোচ্যা মনত্ পাল্ তুলি।
বেড়েলুঙ্ দেজ্-বিদেজ্,
পধে-ঘাদে, শহরে-বন্দরে।
ন’ পারিলুঙ্ চিদ্ জুরে,
এ মন’ আওচ্ পুরে,
ম’ মনান্ আমিজে পুরি থায়,
য়েল্ মোনো হিলোভিদিরে।

কারে পেধ’ চায়?
কারে দেধ’ চায়?
ম’ মনান্ মুই ধুরি ন’ পাং।
শেঝ্ মেঝ্ মনান্ থীর গুরি,
অধ’ জাগাত্ এলুঙ্ ফিরি…..
ঈধোত্ তুলি পারঙ্ নাহি,
আরেযিয়া দিম্মাদান্।

দীগোল্ ভালক্ বজর পরে,
বুড়োরান্যাঁ ঘুরি চানাহ্।
মোনো আদামত্ হিলোভিদিরে।
এবল্ মর মন্ তুবোলর!
কি উধের, কি পরের!
মন্ বারেঙর উলপুজ্যা,
মকতবা পঝানী লারি চাঙর।
কন্ পঝা কুনদি পরের।
এগ’দে ঈধোত্ উধিল’ তরে।

সে ধেক্দীঘোল্ মুড়োমুড়ি!
থেক্ খে খে জিরে জিরে উধি উধি।
বুগোত্ বানি রাঙাঁ স্ববন্ ভুদি ভুদি।
গঙেঁবার গুঙিয়েই,
আঝি রঙেঁ কাদেয়েই।
চোগোত্ ভাজেনী এব’ তর?
সাঙেত্ সমার মর জনমভর।
সুগো-দুগো কধানি জুম্মবী….
কাদেয়েই তোমালই আমি।

ধুজিয়ে ধুজিয়ে ধুজোধুচ্যা এল’ জুমানী।
এ গর্ আমার ও গর্ তমার।
দ্বি গর’ ছেরে তাগলক্ পাদি…..
এক্ ঘাধ’ পানি খেয়েয়োই,
জুম্মবী তোমালই আমি।

পুষমাস্ এলে…….
মিধে মিধে রোদোত্ পিঠদি,
তর কবাকালা চুলানি ইতদি,
দগিন্ ধাক্যা ইজোরত্,
দোরোকুরে পিজোরত্।
নিগুজ্ নিগুজ্ ভাবনার সেই…….
রাঙাঁ স্ববনানি এব’ দেগচনি?
পিত্থীমির বেক্ জঞ্জাল্ ভাবনা!
এবার এজোক্ এজে,
সে দিনুন্ এজ’ মর চোগোত্ ভাজে।

জুমো ধানানি রং ধুরিলে,
কায়কুরে তদেক্ উড়িলে,
গাজে গাজে বেলালায়া, উগুরিক্
বাল্যাপেক্ পুরিলে।
সুরতুলি ধুধুক্ বেহ্ বেহ্,
ঝুবুর ঝুবুর গাজ্ চেহ্ চেহ্,
কুই কারিনে বাদল্ মারিদে….
লামা গীত্ গেহ্ গেহ্।

কাদিমাস্ গেলে,
ধান্-সুধো ফুরেলে,
পিয়োক্ পিয়োক্ জুরো পুরিদো জুমানী।
নিবিলি অধ’ পধ্-ঘাট্!
কুজি রাঞ্যাঁত্তুন্ অই যেব’ বুড়োভুইঁ।
কজমা কজমা অই উধিবো……
আমা রাঙাঁ মনানি।
ঈধোত্ আগেনী এব’ তর?
সাঙেঁত্ সমার মর জনমভর।
সুগো-দুগো কধানি জুম্মবী,
কাদেয়েই তোমালই আমি।

বিঝুদিন্ এলে,
জায়জুগোলে….
মিধে জঙঁরার আকরুজি,
সিংগোবা দোরোত্তুন্ আঝি আঝি,
পার্বুয়া ধক্ পুঝি পুঝি,
মরে বলেদে।
এদক্ বজর পরে,
মাজারা ন’ পেলুঙ্ কায়কুরে,
সে আরে যিয়া দিনুন্।
বানাহ্, আগাজত্ বুইয়ারে উড়েয়ে,
সেমেততুলো ধক্গুরি….
বুইয়ারে যিন্দি নেজায় সিন্দি…
এ মনানত্ ভাজেদে।।।

০৪/০৩/২০১৫

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - jumjournal@gmail.com এই ঠিকানায়।

আরও কিছু লেখা

Jumjournal

Administrator

Follow Jumjournal

Leave a Reply

Your email address will not be published. Required fields are marked *