icon

জুম্মবী তর এ দোল্ নাঙর হাবিদাঙ্ হন্যাঁ (চাকমা কবিতা)

Jumjournal Admin

Last updated Jan 8th, 2020 icon 226

জুম্মবী তর এ দোল্ নাঙর হাবিদাঙ্ হন্যাঁ (১০ই নভেম্বর স্বরণে)

আলোময় চাকমা


জুম্মবী,
যে নাঙে ডাগিলে হুজি অচ্,
যে নাঙে বাজিবের স্ববনে দেগচ্,
যে নাঙে পহঁত্যা আমল্যা নুয়ো দিনর,
নুয়ো আঝা বুগোত্ বানচ্।
জুম্মবী হধে চাঙ্, তর এ দোল্ নাঙর —
হাবিদাঙ্ হন্যাঁ? মনত্ রাঘেচ্।
তেহ্ অল’ আমা বেগর লারমা লারমা।

জুম্মবী,
যে নাঙান্ বুগোত্ বানি,
সাত্ দোজ্যা ছড়া ঈজি,
রাঙাঁ বেল্ রাঙাঁ আঝা,
আমা বেগরে দিবে আনি।
যে নাঙান্ বুগোত্ রাঘে,
উজে যেবে আগে আগে।
হুজুদি নেজেবে অন্যেয় অবিচার,
আড়াজাঁক্ জঞ্জাল্।
জুম্মবী হধে সে দোল্ নাঙর —
হাবিদাঙ্ হন্যাঁ? মনত্ রাঘেচ্।
তেহ্ অল’ আমা বেগর, লারমা লারমা।

জুম্মবী,
যে নাঙান্ আঘে ভিলি,
থেই পারিবঙ্ মিলিঝুলি।
যে নাঙান্ বেগে জানি,
সে নাঙে জাদ্ ভেই মা-বাপ্,
সমাজ্যা সমারী জাগে জাক্ —
ইচ্চা অই পারির চিনেচিনি। 
জুম্মবী হধে, তর এ দোল্ নাঙর হাবিদাঙ্ হন্যাঁ?
তে আমা বেগর্, লারমা লারমা।

জুম্মবী,
যে নাঙান্ ন’ পেদাক্ আজু-পিজু,
হাদে যিয়ন্ জীংকানি উজু উজু।
এই তর এক্কান্ দোল্ নাঙ্,
যেক্কে অল’ ফগ’দাঙ্ ;
উদিল’ নুয়ো বেল্!
জাগি উদিলাক্–
মুরুল্লা সিধেসিধি মানুচ্।
গোদা পিত্থীমি অল’ ফদাঙ্তাঙ্।
বানা এক্কান্ দোল্ নাঙ্।
জুম্মবী হধে চাঙ্, এ দোল্ নাঙর হাবিদাঙ্ হন্যাঁ?
তেহ্ আমা বেগর, লারমা লারমা।

জুম্মবী,
যে নাঙে এ দেজত্ বুয়ের বাই।
গাজে গাজে ফুল্ ফুদোন্।
যে নাঙান্ পেগো গীদোত্ শুনি পেই।
যে নাঙে জুমোত্ বীজ্-বিজি-
পোগোন্ পাদা মিলি উদোন্।
যে নাঙান্ আমা মনত্ নিত্য জবে,
জুম্মবী তুই হবে,
এই তর দোল্ নাঙর হাবিদাঙ্ হন্যাঁ?
তেহ্ অল’ আমা বেগর, লারমা লারমা।

জুম্মবী,
পহঁত্যা রাজি পরি এল’,
জুম্মবী তর নাঙর সাম্বাদ্ দেনা —
মর থুম্ ন’ অল’।
ইচ্চা ১০ই নভেম্বর —-
জুম্মবী তরে দোঙর্ হবর ;
জাগি উঠ্ ঘুমোত্তুন্, হবং বান্,
এ দিনোত্ তর নাঙর্ হাবিদাঙ্ —
বুগো লো দিনেই, তরে হোচ্ পেনেই,
ছাড়ি যিয়ে পিত্থীমি।
যাদি আয়, শবত্ হাগি —–
তার বুগো লো দাম্ দিবে,
তর এ দোল্ নাঙর মান্ রাঘেবে।


১০ নভেম্বর ২০১৪

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

Jumjournal Admin

Administrator

Follow Jumjournal Admin

Leave a Reply

Your email address will not be published. Required fields are marked *