icon

জুম্মবী তত্তেই (চাকমা কবিতা)

Jumjournal

Last updated Jan 8th, 2020 icon 344

ফিরি ইচ্চা সৈন্যর ডায়েরীত্তুন্ –
জুম্মবী তত্তেই

আলোময় চাকমা


দীঘোল্ পোজোচ্ বজর।
ধুমো ছেরে ছেরে!
গুলি ছেরে ছেরে!
শত্রুলোই মোহ্ মি গুরি!
মরঙ্ বাজঙ্ লারেই গুরি।
ঠিগি এলুঙ্ ঠিগি রোইয়ঙ্।
হধে জুম্মবী, এ লাড়ে হিত্তেই?
জুম্মবী,
মর এ লাড়ে বানা তত্তেই, বানা তত্তেই।

টারেঙ্ রিঝাঙ্ আঙুঁদি ;
মোন্-মুড়ো ছড়া-ছড়ি।
রেদেবিলি ঘুরি ফিরি,
চোগো পাদা এক্ না!
হাদেয়ঙ্ হদক্ ঝুরিঝুরি।
জুম্মবী, হধে এ দুখ্কানী হাত্তেই?
জুম্মবী,
বানা তত্তেই বানা তত্তেই।

পেঠপোড়া ভুগোত্ হদক্ হিয়েই,
পোড়া হালা চাম্বাত্।
হিরিঙ্ হিরিঙ্ আমিলা ঝুল্।
ঘুজিঘুজি বাচ্চুরি তোন্।
হুমুরো তোন্ মিজেল্ বাচ্ নেই।
বানা ত’ হধা, বানা ত’ হধা —
ভাপ্যঙ্ ভিলিনে।
জুম্মবী, হধে এ ভাবনা হাত্তেই?
জুম্মবী,
মর ভাবনা বানা তত্তেই, বানা তত্তেই।

দীঘোল্ পোজোচ্ বজর।
মজা-পুগি, পুক্-জুক্ এক্ বিচ্চোনত্,
হাদেয়েই হদক্ সমারে।
বিচ্চোন্ দ’ নয়, রুভোঘর!
ফুল্যাঙ্-হাদ্দোঙ্, ডেমা-ডেম্যা।
অনতিত্যে নিরিতিত্যে সপ্পানত্।
জারহাল্যা উমোহাবর টানাটান্যাঁ।
সুগরে সুখ্ না, দুগরে দুখ্ ন’ হোই—
গুঙিঁ যিয়ন্ দিনুন্, তুয়ো দ হাদেয়েই।
জুম্মবী হধে হাত্তেই?
জুম্মবী,
মর এ দুখ্ বানা তত্তেই, বানা তত্তেই।

দাঙ্ দাঙ্যা পাগানা রোদ’ মায়।
হদক্ সমারে আর গায় গায়।
তিরাজে যেক্কে পরান্ হানে।
হি হলাগাচ্, হি মোজো দেল্,
হুলুক্ পানিয়ানিয়ো তান্ ন’ মানে।
ন’ গাত্যা, এক্ হাবরে,
ঘামে ভিজি গাদি।
পোজোচ্ বজর হাদেলুঙ্ —
বানা আহদি আহদি।
জুম্মবী হবেনি, এ দুখ্ হাত্তেই?
জুম্মবী,
বানা তত্তেই, বানা তত্তেই।

বেল্ পুগো রয় যেক্কে —
তারুম ঝাড় গুজুরি উধে,
আ ধুবধুব্ জুনো পহরানি,
দেগঙ্ ন’ দেগঙ্ গুরি।
নিবিলি তারুমোত্ যেক্কে সুধোফুদে।
মনত্ উধে গায় গায়,
চোগো পানি পেলাঙ্ বায়।
তুয়ো দ হাদেলুঙ্ পোজোচ্য বজর।
শুনিচ্ জুম্মবী, এ আবিলাচ্ হাত্তেই?
জুম্মবী,
বানা তত্তেই বানা তত্তেই।

ঘুর বরিজাত্ দেবা দরত্।
বান্দর’ ধক্ ভিজি ঝড়ত্।
ভিজে হাবর হিয়েত্ শুগেই।
ওঁমিয়া ওঁমিয়া হর’ হর’,
হাদাস্যা বাচ্ মিজেল্ দিনেই,
তুমবাচ্ ভিলি মনে গুরি।
ঝাড়ে-জঙলে রোইয়ঙ্ পুরি।
এ দুখ্কানী মনত্ ন’ রাগেই,
জুম্মবী, হধে হাত্তেই?
জুম্মবী,
বানা তত্তেই বানা তত্তেই।

আগাজর তারা গুনিগুনি,
অগলগ’ র’ শুনিশুনি,
দ্বি আহধ্ সিধেন্ দিনেই,
পুগোজুন্ পুজিমে যায়।
সাতবোন্ তারা মিলে যান্,
হেচ্চোঘু মাদি পিদিত্ তলে।
শন’ হাদা ফুদোদন্ অলে।
হাদেয়ঙ্ দিনুন্ হুম্বিক্ ন’ হেই।
হধে জুম্মবী, এ দুখ্কানী হাত্তেই?
জুম্মবী, বানা তত্তেই বানা তত্তেই।।।


০৮ নভেম্বর ২০১৪
উৎসর্গ: সকল শহীদ, ও মানবেন্দ্র নারায়ন লারমা স্বরণে।

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - jumjournal@gmail.com এই ঠিকানায়।

আরও কিছু লেখা

Jumjournal

Administrator

Follow Jumjournal

Leave a Reply

Your email address will not be published. Required fields are marked *