জুম্মোদা ত’ উধিজে (চাকমা কবিতা )

0
38

জুম্মোদা ত’ উধিজে

আলোময় চাকমা

আগাপাদাত্ খৈ-চোল্,
এগেমে মারিকেম্ চাঝি।
বাগানর আগমুলিম্ ধুচ্যা ফুল্লোই,
মনর মেইয়াঁনি নিয়িরেই আজিপুজি।
থোবেইয়া মর বেক্ কোচপানা —
ত’ উধিজে নীঝি নীঝি।
গোজেলুঙ্ জুম্মোদা ত’ করত্,
যুনি অচ্ তুই মরদ্!
গুজি ল’ মর এ পূজো—
ত’ মন্ ঘরত্।।।

বুগ’লো মারিকেমত্ ঢালিদি,
আওদি! আওদি!
বুজি ল’ মূয়োচেরাক্ চেনে,
জোব্ নেই মর মুগেদি।
পরাধীন্ এ দেজত্তুন্ মরে বাজা।
কয়দিন্ থেবাহ্ ভেইয়ে ভেইয়ে রেনারেনি।
আঝা রাগে এক্ বুক্,
ইচ্চা ত’ উধিজে বারেলুঙ্ হুচ্,
ন’ লামিম্ পিজেদি।।।

সে যুগোত্ রাধামন্ ;
সাজঙর জলগাঞ্জা মাধাত্ বানি,
ধনপুদির মেইয়াঁর খোরাক্কই —-
সঙ মো’মি লাড়ে গুরি,
যুদ্ধত্ এলগোই জিনি।
সাজঙর জলগাঞ্জা বুঞ্যাঁ দুখ্কানী,
ভুলি গেল’ ধনপুদি।
ফিরি এল’ সে যুগত্ আরে যিয়া,
পেলাংবিয়া সুখ্কানী।।।

এ যুগর জুম্মবী (ধনপুদি) মুই ;
ন’ পারঙ্ জলগাঞ্জা বুনি।
এলাফেলা মিলেজাত্ ;
গুচ্ নেই, উজ্ও নেই,
গাত্ বল্ নেই।
সম্বল্ মর যা কিজু আগে —
বানাহ্ এক্ সাগর্ চোগোপানি!!!

তিদোনেই ইচ্চা মর জিংকানী!
ধারাবিয়া নিত্য চোগোপানি!
এদেহ্-আগারে যিন্দি যাচ্,
শুনিবে মরা হিজাক্!
আ বুড়োবুড়ির আভিলাচ্!
বুজিবার শুনিবার কিয়য় নেই,
ফুরেদ’ গেলঙ্, কোলকুজ্যা গুরিনেই।।।

যারে মারিবের কধা!
যে মুরিবার কধা!
তে আগে আঘার খেই বলবলা।
ছিদি পরের ডেনে-বাঙেঁ, পিজে-মূজুঙেঁ,
উন্দুরবন্যাঁ ধক্, য়েলমাঝি ধক্!
এদেশ্চানত্ গোদা।।।

ও পরানর জুম্মোদা ; ন’ কিয়া দেগর,
ইচ্চা মর ডদ্দর! থত্তর!
ঘুরি ন’ পারঙর —–
চেরোপালা কালাদেনে,
ধুরি খেলাক্ যাহনে!
পধে-ঘাদে, ঝাড়ে-জঙলে,
ভেদের সেদের আদাম দীঘোলি।
এ দুগোত্তুন্ মরে বাজা,
এ পূজো দিনেই, চুল্ বেড়ে ঠেঙত্ পুরি,
ইচ্চা তরে গরঙর কোজুলী।।।

এ যুগত্ জুম্মোদা (রাধামন্) তুই ;
রদ্-বল্ বুগোপাদা বেক্ আগে তর।
যুনি অচ্ মরদ্ জাদি,
বাজেই পারজ্ দুখ্যা মা-বাপ্,
পরাহবাল্যা জুম্মবীবে,
আ পরাধীন্ এ জাগামাদি।।।

গুজি ল’ মর এ পূজো ;
ফিরে ন’ দিচ্ মরে জুম্মোদা।
ত’ সুগো কধা বাদদি।
দেজ্-জাদ’ কধা ভাবী,
অগোই বেক্কুনে এক্ জধাহ্।।।

দজ্যা পাড়র ত’বিয়ে ঢেলাত্তুন্,
ন’ চাঙ্ মুই আওজর নাকশাফুল।
সাগরত্ জলতুঙ্গি বাঘ’ ডরে!
মুই চাঙ্ তিন্নো কেদাকতুগোত্,
দ্বি আধ্ সিধেন্ দিনেই —
তুই-মুই স্বাধীন্ দেজত্ আঝিরঙেঁ,
জিংকানী গোঙেঁই সমারে।।।
২১/০২/২০১৫

LEAVE A REPLY

Please enter your comment!
Please enter your name here