icon

তরে নিবেত্তেই মর এ্যাঝানা (চাকমা কবিতা)

Jumjournal Admin

Last updated Jan 7th, 2020 icon 108

তরে নিবেত্তেই মর এ্যাঝানা

ম্যাকলিন চাকমা


আগাত্যা রিজেঙর দঝর সিরি
দিঘোল সারাল্যা পহ্দত আহধি যাধে,
ছলছল্যা মন’ রিবেঙর ধুঝিত্তুন
তুজিমপুরী পরানবির কোচপানা
আবাধা ঈদোত উদিল’।

দুগোগুলোর জিংকানিত বেল ডুবোন্দি নিরিবিলিত
জুম চাগাত পাদা যচ্যা গাঝ ঘরাত,
মিধে আভা হেলানি পেলাঙ পেলাঙ হলাত
তরে ভাবি আবাদা আজি গেলুঙ
থিদেব্বরি কোচপানার গঙারত।

এভ’ হি মর কহ্ধা ঈদোত উধে পরানবি?
এভ’ হি আঝি যাচ আহ্ওচর গঙানিত?
নাহি গভীন তারুম ঝারত
গা ছারি উত্তে হাদাবনত
হিজেক সারি বেপাকত পরি
দিঘোল বজর ধরি হাদি যার তর নিবুল্যার মুরোল্যা জিংকানি?

পরানবি, এ্যাদক দুঘ কিত্তেই কধে?
কিত্তেই এ্যাদক বেপাগর রদবদল?
মন’ দুঘর হেনত হেংগ্রং অর সুর ব’যেইয়্যা
লাগে কিত্তেই?
হিজেক সারি ক’বার মনে কয়
এভ’ আগচ তুই ম’ ভাগে।
সেনত্তেই এ্যাঝঙ বারেবারে বার্গি পেগর গঙারে।
এ্যা সুদোম তত্তেই,এ্যা আহ্ওচ তত্তেই
বিলি স্ববন বিরোঙ ছলগ’র সমারে।

পরানবি, ও পরানবি, কুধু তুই?
তরে নিবাত্তেই জুমচাগালাত মর গিরিত্তি পাদানা।
তর কহ্ধাত কহ্ধা রাঘেই
জীবনর লগর বানেবার উদিঝে হেচ্ হুমরোরির সমারে ধান শিঝেত উরি বেড়ানা।।

Share:
জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

Jumjournal Admin

Administrator

Follow Jumjournal Admin

Leave a Reply

Your email address will not be published. Required fields are marked *