icon

সবনর কজমা গাবুরী (চাকমা কবিতা)

Sujan Changma

Last updated Sep 3rd, 2020 icon 174

সবনর কজমা গাবুরী

সুজন চাঙমা জুম্মোধন


বেল দুবোন্দি অক্থত আহ্’দঙর গাই গাই
দুরোর মোন মুরোউন লাগে যেন কাই কাই,
রাঙা বেলানে দুবেল্লোই মরে চেই চেই,
পিঝেদি কন্নাহ্ যেন এযের পারাপাং
রিনি চেলে নেই নেই, কিয়োই নেই।
এচ্চি যেন ঝাদি লামি এযের আনধার
রিনি চাং বেলান পঝিমেদি বার বার,
নিবিলি ঝারানিত বেল’ পুগে দগত্তন
ঝাক ঝাক পেক্কুনি তারা বাঃত ফির’দন।

মাত্তর, মুই? কিজেনি মুই কুধু যাঙর!
এচ্চি মুই বানা থুচ থুচ মুজুঙেদি আহ্’দঙর।
বেল’ পুগে দগত্তন ইয়াং ইয়াং গরি
পরানর কন’ দর নেই, গেলে যাং মরি।
মুই মাত্তল কন’ এক কজমা গাবুরীত্তেয়
উজে উজে আহ্’দঙর মুই বানা তাত্তেেয়।

যেক্কেনে বেলান লুগিল’, জুনান উদিলু
সেক্কে মর পাচ-পরান জুরেল’, সন মরিলু।
পুগো কিত্তে মু গরি ইজোরত বঝি আঘে
ঘুর ঘুর গরি মুআন তার দেঘে,
কিজেনি তে কারে নিনেই ভাবে।
জুচ জুচ গরি গেলুং, সাঙুআনত রলুং
খাক্কন জেরে তারে, আ কি ভাবর কলুং।

দর দর গরি পিঝেদি চেল’ তে রিনি
কল্হ- যানেহ্ দ দরেয়ুং কিত্থে এযচ এহ্ঙুরি?
সেক্কে তার দিবে চোক পান্যে পান্যে গরি
কি যেন কধ চাই ম দিআন আহ্’ত ধরি;
র নেই মুওত, চোক্কুন বানা চোঘোত
ভালক্কন জেরে মাদিলু, এক্কা এক্কা আহ্’ঝিলু
এহ্’দক দিন জেরে ইহ্’ধোত কেনে উদিলু?
সেক্কে মুই বুপ, বুঝেবার ভাচ নেই
থেবত থেবত গরি রলুং বানা চেই।
সে রেদোত সমার অহ্’ল’ পোতপোত্যে জুনপহ্’র
আবাধা কলুং, এচ্চি রেত্তু বানা তর আর মর।

কন দুঝে মরে এধকদিন দুঘোত রাঘেলে
মরে ছারা থেই পারিবে কেনে ভাবিলে।
মুই জানিদুং পরান দা, তুই এবে ফিরি
বাঃরাত আবুজি কল্হ কজমা গাবুরী।

চোক মেলি চাংগে ফদাংতাং পহ্’র
কুধু গেল গাবুরী, কুধু গেল জুনপহ্’র?
নিমোন নিমোন নাগর কাল্লোই মাদিলুং
এহ্’দক দুক গরি তা ইধু গেলুং;
ধুম ধুম গরের পরানান মর
কি যেন আহ্’রেলুং আহ্’মক ওহ্’ই ভাবঙর।

১৭/০৯/২০১৮

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - jumjournal@gmail.com এই ঠিকানায়।

আরও কিছু লেখা

Sujan Changma

Author

Follow Sujan Changma

Leave a Reply