ঈদোঘর ( চাকমা কবিতা )

0
48

ঈদোঘর

আলোময় চাকমা


রাঁন্যা মোনোত ছাড়া ঘর,
এস্যে গেলুং ভালকদিন পর।
আমুঞ্যাঁ মনানত হি উদি হি পোড়ি,
তাজা ওই উদিল’ ঈদোঘর!

এব’ পাজ্যা আঘে সাঙুয়ান।
ইক্কে দেঘিম পারাপাং তা মুয়ান।
পিজোরো দোরোত্তুন রেনি চেবগি,
মাধাত বেড়েইয়্যে তার হবঙাঁন।

সাঁঙু পোইদ্যাত উল ফুদি যেইয়্যে,
মানুচ নেই। কন্না আঘে হাউয়্যে।
হংগ্রং ওই আঘে হরপাক বুদি,
মনে অয়, মাসমুলো আগে জোয়েয়্যে।

ইজরর এক হোনাদি পোড়ি আঘে ইক্কো ধুধুক।
হদক বেইয়েই “তেত্রেনাধুক তেত্রেতুক”…
ধুধুগো তালে হোয়েই মনঅ হধানি,
লাগত পেলে মনত সুখ,
লাগত ন’ পেলে মনত দুখ!

মনত দুখ লাগিলো শিঙাঁবো রেনি চেই!
কন লাঙ্যাঁ পোড়ায় যিয়ে ইক্কো পাবত কাবিনেই।
এবঅ আগঅ ধক বাভেইয়্যা আঘে,
সাঁঙু দোরোত পিজুম বাজত আবুজেই।

শিঙেঁবোত বাহ্ গুজ্জন ভঁঙরায়।
অবুঝ পুক। তে হি হবর পায়?
এ শিঙাঁবোয় এককালে দিদো হুয়োঁং গুজুরে,
লাঙ্যা লাঙোনীর কানানি সজাগ গোরি দিদো রেদোমায়।

হেংগ্রংআন পোড়ি আঘে চাজাত অনালে।
আহ! জুম্মোবী হদক বেইয়্যেয়্যে গমদালে।
ভাত-পানি ঈদোত ন’ অয় তর,
পরানীর নোনেইয়া হেংগ্রংঅ র’ শুনিলে!

আধত তুলি ধুরি চেলুং হেংগ্রংআন।
লাত্তে চাত্তে ভাঙী ফেলেলুং দামানান।
হাক্কনত্তে হি ঈদোত ওই, কারে চিতপোড়ি,
চোঘো পানিয়ে ধাগা গেল মর মুজুঙাঁন!

মোনো ঘরান ফেলে এলুঙ পিজেদি।
রংচং স্বমনানি মনত্তুন যার বিজিদি।
ভাবনার স্বমনত ভাজী ভাজী লামি এলুঙ,
জাগুলুক মনানে এস্যে মর ঈদো ঘরান নেজেল’ হুজুদি!!!


১৩/০৩/২০১৮

LEAVE A REPLY

Please enter your comment!
Please enter your name here