কমলে নিবেগি? ( চাকমা কবিতা )

0
39

কমলে নিবেগি?

আলোময় চাকমা


আওজর নাগুরী!
হধে চাঙ্, হুদু থোম সুমুরি;
তত্যে নিঝী থুয়ে আগ্ হোচপানান?
হবর দ’ পাহচ….
দিন্নো এলে ঘঅ’ ঘঅ’।
কদঅ মানুচ এযন যান,
ছিন ন’ পড়ে মুলচানান।

একবার ভাবং,কব’গত থোম।
ন’ হোচ তর উন্দুরো তুচ্যা।
বিস্বেস নেই, হক্কে নেজে হক্কে হুদু,
কুদি দোন্নোই বাহ’ গুরি।
এবার হ’, কব’গতও কেনে থনাহ সুমুরি।

ইক্কো গুরি ফুলবাড়েং।
গোদেল থিয়া বেক পঝানি,
মামাহ থয় ভেলগুরি।
সিয়তও কেনে থোমআই?
ভুজি, মামাহ যুনি দেগন নিঝী থুয়ে হোচপানান।
সেনেত্যে ন’ পারং ফুলবাড়েংয়োতও সুমুরি।

মামাহ মাধা উয়ুরেদি থায় সাম্মোহাঝা।
সিয়ত থয় সাবপিত, উড়িংশিং, ঠাণ্ডামানেক…
ঝাক্কো দারুর মুল পঝানি।
মামাহ ঘুমত ন’ পত্তে দারুয়ানি আঘে হি নেই,
সাম্মো হাঝাবো হুলি চায় আক্কোরি।
জঘা চাং, থোম ভিলি সাম্মো হাঝাবোত সুমুরি।

ভুজি দাগি থান গুধি ভিদিরে।
মামাহ দাগি থান সিংবাগাত।
ইয়ত থলে দেবাক পাহ,
উবোত থলে দেবাক পাহ,
গোজে থোম ভিলি বেরচাগাত।

জঘা চাং ভদঙত্,
থোম ভিলি লুদুঙত,
দিপ্যা কাবি চালঅ ছেরে।
হুবোত থোম, হুল ন’ পাং ভাবী এ মাধান।
বুক ন’ বানে তর বুজোস,
মনসজ, চিতপাগল মুই…
যুনি আহরে ফেলাং? পাওরি ফেলাং?
আগগুরি থুয়ে আওজর হোচপানান।

বাড়েং ডিঙিঁরালোই সমার বুদি,
মুই থাং উজোলেঙত পুড়ি।
চিগোন কানিলোই গিরেহ দি,
সিধেনর বেড়’ চাবালাত ঘুমত পত্তে,
আধ বাভে গোজে থং মাধাউজু জুউচ গুরি।
নিঝী থুয়ে আগ্ হোচপানান,
হধে চাং কমলে নিবেগি,
মর আওজর হোচপানার নাগুরী?
পরান চোখচোখ গুরি, হয়দিন রাঘেদিদুং সুমুরি।


  মডেলঃ- স্নেহা ১৩/০১/২০১৮

LEAVE A REPLY

Please enter your comment!
Please enter your name here