জিংহানির লামা ( চাকমা কবিতা )

0
39

জিংহানির লামা

আলোময় চাকমা


সীদে সীদি মা, বাপ মর,
জ্ঞেদি, গুত্তি বংশধর।
কেনে হাদেলাক জিংহানি,
গমে ভাবিলে আনুদ্যর!

চিগোন হালুন ঈদোত অলে,
চোঘোত ভাজন গমেদালে।
কেনে হাদেলাক আজু-পিজু,
হিত্তে পুড়ি আঘি অনালে।

সেক্কে মুই চিগোন এলুঙ,
বাবা লগে বাজারত গেলুঙ।
বেজা-কিনা কেনে গরন,
দ্বি চোঘেদি পত্থম দেলুঙ।

বাবারে দেখক্যং পদে পদে,
গঙাঁর জিংহানিত এত্তে যাদে,
পাগত ন’ থুরি সপ্পানত।
চাক দাড়িত্তুন থগা হাদে।

দুইশ গ্রাম্মো’রো পাবা ধুরি,
পঞ্জাচ গ্রাম হিয়োন্দোই মারি।
সীদে সীদি পিয়ন ভিলি,
বাবারে গুজ্জন কাড়াহাড়ি।

মাল বিজিলে বাবা মামাহ,
শিলত সমায় সিজে তামা।
মাবি নিলে একমণ মাল,
কামিনী ফেরে অদ্দেক উনাহ।

আধঅ তাগল জিঞ্জন ধুরি,
গদা জিংহানি দুখকাম গুরি।
জিরেন নিইয়া দুঘে দুঘে,
তুওদ’ আঘি নাদানত পুড়ি।

বুগোত আধদি হোই পারিবে?
থগান ন’ হান ত’ মা-বাবে।
যুনিও তারা ভাঙী ন’ কন,
মুয়ান চেনেই বুঝি লবে।

ইজে মিজেল, একসাজ আওজ,
কনঅ দিন তুই কিনি চিওজ?
ইজে দামে কিনি পেবে,
হোল্যা তলাত দাদঅ হাবোজ।

ইক্কে, পাল্লাবুয়ো অয়ে ডিজিটাল,
জুম্মোয়্যার, নেই আল নেই আল।
ভালেদো আঝায় পুও-ছা কলেজত,
ইন্দি, “উড়িঙেঁ চুমি যাদন বাঘঅ গাল”।।।


৩১/১০/২০১৭

LEAVE A REPLY

Please enter your comment!
Please enter your name here