জুম্মোবী তরে দেঘং ( চাকমা কবিতা )

0
39

জুম্মোবী তরে দেঘং

আলোময় চাকমা


বেলান উদিলে হোবাল সঙ্,
শিরোপানি ফুদোউন যেক্কে জ্বলন সোনারং।
সে শিরোপানি ফুদোত জুম্মোবী,
তর মিধে মিধে আঝি মুই দেঘং!

মোনো ঘরত এগামনে,
শুনিয়ে নেই কিয়জনে,
নানু যেক্কে বায় হেংগ্রং।
সে মিধে মিধে হেংগ্রংঅ র’ত জুম্মোবী,
তর ননেইয়া ননেইয়া র’য়ুন মুই শুনং।

আগাজত যেক্কে উদিবো রানজুনি,
প-হ-র অয় য়েল মোন,
জুমোত ছিদি পড়ে সাতরং।
চোঘোত ভাজে তর দেবপাচ হাদি,
“রাঙাঁ হাদি কালা পেল”।
সে রানজুনিয়ানত জুম্মোবী,
তর ভরন বুক্কো মুই দেঘং।

কলা পাগানা রং ধানশিজে,
মাত্তল বুইয়ারে নাজদন।
লেজা, তুগুন, দিয়েল্যা, পাদাচ্যে…
গদা জুমর মুলুক মুলুক ধানশিজেত জুম্মোবী,
তর মুয়ো চেরাক মুই দেঘং।

ভাদঅ, আজিনত ধুবমেঘ,
উড়ি বেড়ায় আগাজত,
সাজন অয় আগাশচান।
ইদোত অয়, চোঘোতও ভাজে,
তর সেই হুচ্ছেমুচ্ছে চুলঝুদোত,
মাধাত বাঞ্যেঁ হবঙান!!!


১৪/০৯/২০১৭

LEAVE A REPLY

Please enter your comment!
Please enter your name here