icon

মরা স্বমন ( চাকমা কবিতা )

আলোময় চাকমা

Last updated Jan 5th, 2020 icon 106

মরা স্বমন

আলোময় চাকমা


চিগোন চিগোন স্বমনানি ভাজি উদে মনানত।
এক্কনে; আড়া কাড়ি ধান কুজি,
জুমজগা, রোদে পুড়ি ঘামে ভিজি,
কাম’ বাগ ধুজেইয়ে সুঞ্জুগ্ মনদোই,
সাজঞ্যাঁ ফিরঙর ঘরানত।
শুনোঙর দুরোত্তুন্ রিপরিপ মুরোত্তুন,
চিক্কো মা’বো ডাগি যার মাল্যারে,
আয় মাল্যা লে… লে…. লে… লে…লে..
হায়হুরে লুঙিঁ মর, রেনি চেই চোখ জুরার মনানত্।
সেক্কে শিরে নাজেই নাজেই,
মাল্যা গরা হার ফিয়োঙত।
হালিক দ’ মর ইক্কে ঘরও নেই, মাল্যেও নেই।
বানাহ্ মরা স্বমনানি থেই যার ধুজ হেই স্বমনত।

চিগোন চিগোন স্বমনানি ভাজি উদে মনানত।
এক্কনে; গাধা গাত্তে আধে পাধে,
ফিরঙর বাজারত্তুন্ দুরোর পধে।
দচ টেঙাঁর খৈ মলা, আনা, ফুনি, তেলশিজিরি..
ছিনিছিনি, পুদিপুদি বাজারানি আনঙর।
বল পুড়ি মেলোমাছ,
তুও কদ’ কধা ভাবঙর।
গেলে দেম্মোইয়ে, চিঝি দাগী…
মরে হামাক্কায় আগন চুগি,
সময় ন’ কাদি হদন হারা একতাল গুরোঝাক।
গেলে ধুরিবাক্কেআই, বেড়েই মরে উদনত।
জপবে দ’ মানা নেই,
কদ’ কধা ভাবঙর মনানত।
হালিক, ইক্কে মর ঘরও নেই, উদোনও নেই,
বানাহ, মরা স্বমনানি থেই যার ধুজ হেই স্বমনত।

চিগোন চিগোন স্বমনানি ভাজী উদে মনানত।
পরাঞ্যাঁ আঘেগোই শহরত,
বজরমুলো ওল ন’ এজের ঘরত।
ফোন গুজ্জে পুরিক্কে দের,
দি ফুরেবও ঘরত এজের।
তাম্মা থুয়ে বিনি চোল আক তুলি,
পরাঞ্যাঁ এলে দিব’ মুলি,
হোগা পিধে, বিনি পিধে দোলেদালে।
এলে আঝিবগিদেআই নাগ’ ফলা ফোলে ফোলে!
অলে, ন’ জানিবো সেক্কে আধি,
আঝার হাং হাং অব’ উদনত।
ইস, হুদু বিনি চোল? হুদু উদোন?
পরাঞ্যাঁ এলে কানিবগি!
ছত্রসাঙ্গ, ইক্কে আমি অনালত!
বানাহ্ মরা স্বমনানি থেই যার ধুজ হেই স্বমনত।

চিগোন চিগোন স্বমনানি ভাজী উদে মনানত।
এক্কনে; তাম্মা কুদের শুউরি আগা,
মুই গজ্যাঙর চানা জগাহ্।
চিজিক্কো ধুজ্জেগি বেড়েহুড়ি,
বাবা, জিক্কুকুক জিক্কুকুক গুরি…..
উন্দি উ ঘরত্তুন ডাগদন মরে,
তিনপুরে লুম্মোন্দি বিজু পুদিরে।
কদঅ কধা ভাবঙর,
ইলেপাদারে চান, তারা…গুনঙর,
ইন্দি মর ন’ কুলোর ঝাড়ে।
তলে মাদি, উয়ুরে আগাজ,
সেত্তমান ওই আঘি অনালত!
হি উদে হি পড়ে, হোই ন’ পারং মনানত।
বানাহ্ মরা স্বমনানি থেই যার ধুজ হেই স্বমনত!!!


০৪.০৬.২০১৭

Share:
প্রসঙ্গঃ
জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - [email protected] এই ঠিকানায়।

আরও কিছু লেখা

আলোময় চাকমা

Subscriber

Follow আলোময় চাকমা

Leave a Reply

Your email address will not be published. Required fields are marked *