বুঝি লোচ্ পরানি ( চাকমা কবিতা )

0
37

বুঝি লোচ্ পরানি

আলোময় চাকমা

খাদি পেজোত্ বাণিথুয়ে হোচপানা,
মিধেসুরে গেইযিয়া তর সেই গানানি…
“রাঙাঁখাদি কালাপেল্,”
“বিষুম্ গেলে ন’ দিস্ গেল্”
আ তর, ননিয়ে ননিয়ে হধানি…..
হুধু গেল’ পরানি!!!
ইক্কেদ’ ন’ জ্বলের ত’ বুগোত্ খাদিপেজ্।
নিত্য দেঘং নানান্ বেশ্।
এনেহ্,
এব’ হি আঘে তর সে হোচপানা?
সে হোচপানা তোগে বেড়াং খাদিপেজত্,
আ তর মিধেসুরোর হধানি….
হুধু গেল’ পরানি?
হুধু, হুবোত্ থুয়োচ্ হিজেনি!

খবংঅ’ পেজোত্ গুঞ্ঝি থুয়ে হধানি,
যে হধাত্ আঝার স্ববন্,
যে হধাত্ বানাহ্ দ্বি জন্,
ননিয়ে ননিয়ে কজমা কজমা হোচপানার হধানি,
হুধু গেল’ পরানি।
খবং নেইয়ার ত’ মাধাত্। ইক্কে চুলো ফিদে,
হাজেহুজচে বোরগা দিদে।
এব’হি আঘে তর সে হোচপানা?
ন’ হুয়ে গুমুরো হধানি?
তোগে বেড়াং এজ’ মুই,
আগর সেই হোচপানা।
হালিক্,
ইক্কে হুধু, হুবোত্ থুয়োচ্ হিজেনি!

খাদিপেজোর ধৌইমাধার চেরাবান্ গুনিগুনি,
হং ন’ হং আমাধিভাজর হধানি।
যে হধাত্ জীংকানির সজপদর থুবেদং মনে মনে।
ভঙিদোং অজার পিত্থিমীর মোনে মোনে।
টুংটাং আভর হাবেই……
যেদং সংসারর দীঘোল্ পধর আলাম্ বুনি।

ইক্কে তুই হি ভাবর!
মনানত্ হি জভর!
বানাঙর ত’ আঝায় তিন্নো হেদাকতুগোর উগুরে….
পেকবাজা এ মোনোত্ ও মোনোত্।
রেগা দোং তর-মর পরানত্।
জীংকানির বেক্ আঝা ত’ আধত্।
বাজেই পারছ্। মারিই পারছ্।
ভাজেই পারছ্। রাগেই পারছ্।
জাত্, মাত্, সংস্কৃতির আলামর,
নকভাজ্ গুজচে হধানি।
….বুঝিলোচ্ বুঝিলোচ্ পরানি!!!
১৮/১২/২০১৫

LEAVE A REPLY

Please enter your comment!
Please enter your name here