“সুঘোর তুবোল” ( চাকমা কবিতা )

0
21

“সুঘোর তুবোল”

আলোময় চাকমা

বেলান উদিল’ হবাল সং,
শিরোপানি সনারং
জ্বলের দোদোক্যা ধান শিজেত্।
হলাপাগানা রং জুমোধান,
য়েল্ চুকচুক আগাশ্চান।
সুঘোর তুবোলে বাজ্যাবারি,
হে যার জুম্মোবীর মন দোজ্যেত।

ব্যেনসং উয়ে লেজা-তুগুন,
স্বাক্ষী দেধন “মেমেছাউলি বাহউন”।
ভাত পেবং হন’ বজরর ধারানে।
গেল্লে বজর দোগিন ধাক্যা,
ঘেই ন’ পারে দিন মাহক্যে
সে ধান দুখ পিয়ে হরানে।

এ বজর…..
হম্বা হম্বা ধান শিজে,
ধান’ ভরে ভাঙী পুজ্যে,
পুড়ি আগন গাঙ’ পধত্ লুঙিনে।
আওজে তুলি গজর বানি,
খেত নয় যেন, “হান চোঘো পানি”।
তুলি থয় উড়ো পরন ভিলিনে।

ফোরে ন’ পারে নিবিলি ধান,
ছেরে ছেরে রোইয়ন এবল নানাঘান।
মাম্রাহ, চিন্দ্রাহ্ পাঘী পাঘী।
জুম্মোবীর আঝিয়ে আঝের জুম,
তমারে বেগরে আগ বাড়েলুঙ্।
ধাহবা এই জুম্মোবীর আঝি রিনি চ’ঘি।।।

০৭/০৯/২০১৫
*ঘেই = বারানাহ্।
*ঘেই ন’ পারে = বাহরি ন’ পারে।

LEAVE A REPLY

Please enter your comment!
Please enter your name here