হি জ্বালা! (চাকমা কবিতা)

0
34

হি জ্বালা!

আলোময় চাকমা


হি জ্বালা! হি জ্বালা!
দেনে জ্বালা, বাঙেঁ জ্বালা!
আর’ মোক্কুয়া উয়ে হালা।
হি জ্বালা! হি জ্বালা!

ইত্তুন্ উত্তুন্ টানি টুনি,
পোষ্ট লিগিলুঙ্ জানি শুনি,
ঘর’ হামানী ত’ গুরি।
মোক্কুয়া নিত্য চোখ্ পিচ্যা,
মু চেলে তার দুমধুচ্যা,
চলা পরে ভ’ গুরি।

ইন্দি নিত্য মনান্ মর,
লাইক্ পল্ল হয় জনর,
রিনি চেবার মনে হয়।
নেট্ থেলে, বেদারী নেই,
সিত্তুন্ আর’ হারেন্ নেই,
নিরেতিত্যা সব সময়।

অলপদামী মোবাইল্,
লাত্তে চাত্তে ন’ ফুদে ঈল্,
দ্বি চোগেদি ন’ দেগঙর পহর।
যিন্দি চাঙ্ সিন্দি হালা —
হি জ্বালা! হি জ্বালা!!!


২০/১২/২০১৪

LEAVE A REPLY

Please enter your comment!
Please enter your name here