হিলর পজ্জন: ইরুক দিনত চাঙমা লেঘা শিঘানা সাতকাম্

0
13

তিন প্রশ্ন নাঙে সাহিত্য আ সাংবাদিক আনিসুল হক প্রথম আলোত ইক্খু কলাম লিক্খে। সিয়োত লেঘা আগে- এক রাজা তিনান পুজোর (প্রশ্ন) উত্তর থোগার। বেগত্থুন দাঙর সাতকামর (গুরুত্বপূর্ণ) অক্ত কি, বেগত্থুন দাঙর সাতকামর (গুরুত্বপূর্ণ) মানুচ্ কন্না আ বেগত্থুন দাঙর সাতকামর (গুরুত্বপূর্ণ) কাম কি?

রাজা গোদা রেয্যাত ঢুল্ দিল’, যে তারে এই তিনান পুজোর মেত ভাঙি দি পারিব’ তে তারে গধেল গধেল বুকশিচ্ দিব’। রেয্যাত কেইবান্যা কেইবান্যা কধগী, পুন্ডিক্খুন এলাক্ মাত্তর রাজারে এই কধানর মেত্ ভাঙি দি ন’ পারন। এক জনর কধালোই আর একজনর কধা কন’ মিল নেই। শেজে রাজা খবর পেলদে ইক্কু সাধু কধা। তে থে’দ জারত। তেহ্ খামাক্কাই গিয়েনী। এক দিনে রাজা অন্য ভেদ্ ধরি সাধুবো ইধু যিয়ে। সাধুবো সক্যে এক্কান পাগারালোই গাত কুরের। রাজা তাত্থুন পুজোর গরে বেগত্থুন দাঙর সাতকাম্যা (গুরুত্বপূর্ণ) অক্ত (সময়) কি, বেগত্থুন দাঙর সাতকাম্যা (গুরুত্বপূর্ণ) মানুচ্ কন্না আ বেগত্থুন দাঙর সাতকাম্যা (গুরুত্বপূর্ণ) কাম কি? সাধুবো কন’ কধা ন’ কয়। তা মনে তে গাত কুরের। রাজা কল’, মরে ত’ পাগারান দে, মুই তরে বল দুঙ। সাধুবো জের্রা আ রাজা কাম গরের। এ অক্তত এক্কো মানুচ ফোবে ফোবে তারা কায় এল। বুগত গোভা। রাঙা লো থেব থেব ঝুরি পরের। রাজা আ সাধুবো দ্বি’জনে তারে চিকিৎস্যে গরল্লাক। তে কল, রাজার পুরন শুত্রু তেহ। রাজারে মারিবাত্যাই যেনেই রাজা সৈন্যউনে খবর পেনেই তারে মাজ্জোন। রাজালোই তেহ্ আহ্ত মেলেল। সাধুবো কল’, রাজা ত’ তিনান পজোরর উত্তর দ্যি অয়্যা।

বেগত্থুন দাঙর সাতকামর(গুরুত্বপূর্ণ) অক্ত অলদে: ইক্যে (এখন), বেগত্থুন দাঙর সাতকামর (গুরুত্বপূর্ণ) মানুচ্ছো অলদে: এ অক্তত ত’ কায় যে আঘে আ বেগত্থুন দাঙর সাতকামর(গুরুত্বপূর্ণ) কাম অলদে: মুজুঙত যে আঘে-তারে উপকার গরানা।

যুনিয়্য ২০১০ সালত আন্তজাতিক মা ভাজর ইনস্টিটিউত বানানা থুম অলে সে ফগদাঙি অক্তত শেখ হাসিনা কোইয়ে, “২০১৪ সালত্তুন ধরি বাঙালা দেজর বেক আদিবাসীউনরে যা যা মা’ভাচ্চোই লেঘা শেঘানা জু গরি দিম।” এই কধাআন বেগর বুক্ ভরি যিয়ে। বেগে খুউজি অই বাজ্জে এলাক ২০১৪ সাল। মাত্তর, দেঘা গেল বান্দর কবাল তারেঙত, গুয়ো কবাল সুরুঙত। বেগে আঝা আরে যিয়োন। এ সরকার আমা ভালেদি ন’ চাই, ন’ চেব’। তেহ্, দ্বি’ এ এনজিও আ চাঙমা সাহিত্য বা’, সাঙু পাঠাগার সমুত্তু নানাঙ জধায়ে চাঙমা লেঘা শেঘানা কাম সুরু গচ্ছোন।

২০১৪ সাল এনেই সরকারে আর একবার মিজে কধা কল। তেহ্ কল যা যা মা’ভাচ্চোই লেঘা শেঘানা কামান সরকার বাজেট ন’ থানা আ নানাঙ অনতিত্যা দেঘেল’। এধক্যে দিনমাধানত এনজিওউনে উজে এযানার ২০১৫ সালত আদিবাসী লিঘিউনে মা’ভাচ্চোই লেঘা শেঘানা কাম আহ্দত লুয়োন। ২০১৫ সালর পল্লে যা যা ভাচ্চোই চিজিউনরে লেঘা-পড়া গরিবার কলেয়্য সিয়ান গরা ন’ অয়। কোই অয়্যা ২০১৬ সালত খামাক্কাই পাচ্চান আদিবাসী (চাঙমা, মারমা, তিবিরে, গারো, সাদরী) ভাচ্চোই লেঘা শেঘেম। সক্যেয়্য নানান অনথন দেঘেই কল ২০১৭ সালত জানুয়ারী ১ তারিখত খামাক্কাই আদিবাসী গুরউনর আহদত তারার বইউন তুলি দিবার। অক্তমজিম বই ন’পেলেয়ু পাচ্চান ভাচ্চোই বই ইঙিল্যে ইচ্কুলত লুমি যিয়োন। মাত্তর, এ বজর (২০১৭) মার্চর এক তারিখ কালের কণ্ঠ দ্বিতীয় রাজধানী পল্যে পাদাত “শিক্ষরাও শিক্ষার্থী” শিরোনামান মরে ভারি ভাবার। ইচ্কুলত বই পিয়োন মাত্তর, তারা শেঘে ন’ পাত্তন। ইয়ান ভারী দুগর কধা-লাজেবার কধা। সিত্যাই তারার চাঙমা লেঘা শিঘানা কিজেখিজ্যা পয্যা। এত্তো এলে তেহ্ গাচ থোগাথুগি।

Injeb Chakma
চাকমা বর্ণমালার প্রশিক্ষক ইনজেব চাকমা

এক কধা উদিলে সাত কধা উদে – হিলর হনসুচুক্যে দিন মাধানত মেরুং, চংড়াছড়িত ক্যাম্পত তারেক ক্যাপ্টেনে এল। সে চাগালা ৩০-৩৫ জন চাঙমা ধুরি আনি অঝাপাত্তু মাদে বাজেই দ্যি। এক্কো বোদ্য বাদে অন জনে মাদে ন’জানন। যে মাদে ন’ জানে তারে ১০ বারি খেই পিয়ে। কিত্যাই, অধিকার চ’ নিজ ওক্কোর ন’ চিনন। ইয়ান এল তা কধা(যুক্তি)। ত্যুঅ আমাত্তুন চেদন নেই। আমনর ভাচ আমনর ওক্কোর শিঘদে নানাঙ অনটন দেঘেই। এয দেঘেই। কি গরিবং, কন লাভ নেই এই লেঘাআন শিঘেলে। রেয্যা (রাষ্ট্র) অন’ অধিকার ন’ থেলে কিচ্ছু গরি ন’ পারে। এই কধাআন মুই আমা চেলাউনর মুয়োত্তুন শুন্নোং। আমন লেঘা আমনর ভাচ শিঘদে, চচ্যা গত্তে আর কি অধিকার লাগে? ও বাপ-ভেই, মা’ বোন লক! জাত্ হিজেবে বাঙালা দেজর অজল দাঙর জাত্ অলদে চাঙমা জাত্তো। আ আদিবাসী জাতিত্থুন চাঙমাউনে বেগ’ মুজুঙে।

তারার আগে আজার বজরর নিজস্ব বিজক্, ভাষা, সাহিত্য, সংস্কৃতি আ চিন্পচ্ছে(পরিচয়)। এ জাদর এগজন সাবাঙ্গী হিজেবে জনম লোইন্যাই যিক্যে মু-পহ্র সিক্যে মু-কালা। এক কালে চঙমাউনে শাসক জাত এলাক। তারা নিজর রেয্য শাসন গুরি এচ্ছোন। রাজা বিজয়গিরি তা’ সেনাপতি রাধামন আ রাজা সেরদৌলত খাঁ তা’ সেনাপতি রন্তুদেবানলোই স’ সাগুচ্যা দেচ জয় গচ্ছোন। সিত্যাই তারা(চাঙমা) বলবলা(স্বাধীচেতা), তলবিচ্চে(বিবেচক) আ ন্যায়পরায়ণ। যিত্যাই চাঙমাউনে অন’দিন পর’তলে থানা আন মানি নি ন’পারন। যুগে যুগে কালে কালে যিক্যেগুরি পারা যায় সিত্তুন এ্যারান পেবাত্যাই চেরাষ্টা গত্তন।

অন্যহিত্তেদি বানা চাঙমা অনার হিলর চাঙমাউনে বৃটিশ, পাকিস্তান আ বাংলাদেজ আমল বা ইরুক দিনর সং নানাঙ বাবত্যা তচ্চ্যা – পেরাশানি, অবিচের গমি যিয়ে – যার। ১৯৪৭ সালত দেজ বিভাগর অক্তত গোদা হিলর চাঙমাউন থিগী থেবা ব’ ন’ দিঘী দিককাভুল অই কেও কেও নিজ জাগা – জমি পেলে ধেই যিয়োন বিদেজত। যারা দেজকুলত রুউয়োন তারার অর্থনীতির বেগ্ শেজ্ গুরি দিয়্যা ১৯৬০ সালর কাপ্তেগদা; সিত্যাই হিলর ঢক্ বদলি গেল। তা পরে এই ছারানাধা গিরি অন’বাবত্যা দিন – কাল্ গঙাদন। বাংলাদেজ এ্যারান অলে নুয়ো আঝা, ন্যুঅ সবন দিঘিলেয়্য তাপরবর্তী সময় আ-র বেচ ছারানাধা – চিত্রিরিংপাত্রাং অলং। ফেনী গাঙ, চেঙেইকুল, মিঙিনি কুল সমুত্তু বেক দোল দোল জাগানি আরেই নাড়েইছড়ি, চেঙেই থুম, কাজালং থুম বাহ্ বানি অন’ বাবদে পরান তোড়াদন।

পিত্তিমী বিজগত বানা দ্বিআন ভাচ্চোই লারেই গরি পিয়ন, বুগর লো দি পিয়োন – ভাচ দ্বি’আন অলদে বাংলা আ বিষ্ণুপ্রিয়া মণিপুরি। আমি বাঙলা ভাজর বিজক খবর পেলেয়্য বিষ্ণুপ্রিয়া মণিপুরি ভাঝর লাড়েই আ সুয়োল কধা দোলে খবর ন’ পেই। তারা ১৯৫৫ সালত্তুন ধরি ১৯৯৬ সাল সং লাড়েই গচ্ছোন, সুয়োল গচ্ছোন। কদক তচ্যা, পেরাশানি, কধক বুগর লো দেনার পরে ১৯৯৫ সালত ২৬ মে তিবিরে রেয্যা সরকায্যা প্রাইমারি ইচকুলানিত বিষ্ণুপ্রিয়া মণিপুরি ভাচ্চানরে ডিঙিরি দ্যি। মাত্তর, আসামত তারার পরানর পাওত্তি বিষ্ণুপ্রিয়া মণিপুরি ভাচ্চান ডিঙিরি ন’ পান। সে লাড়েয়োর ধারাদিঘলী পাথার কান্দিত ৫০১ ঘন্টা রেল পদ বন্ধ গরি দিয়্যা অয়্যা। এই পোইদ্যানে ১৯৯৬ খ্রি: ২৬মার্চ পুলিশর গুলিত সুদেষ্ণা সিংহ মরি গেলে গোদা আসমাত সুয়োল আর বেচ ছিদি পচ্ছে। শেজে সরকায্যা তারার পরান দাবী গজি লোই ২০০১ সালত ৭ ফেব্রয়ারী ১৫২আন ইচকুলত তিন কøাস সং চালু অয় বিষ্ণুপ্রিয়া মণিপুরি ভাঝর বই “কনাকপাঠ”। মাত্তর, সরকারে অলর গরি বই ন’ থায়। নানাঙ বাবত্যা তচ্যা, পেরাশানি আ নানাঙ ধক্যে গরি তারারে দোঙেবার চেইয়ে। ইশকুলানিত পর্বোয়া গুরউনত্যা নেই বই, নেই মাষ্টর, নেই সরকারর আওজ-ধারাজ।

প্রসাশনিক জটিলতা নাঙে চলে নানাঙ তচ্যা, পেরাজার। মাত্তর, মা’ভাচ্চানরে রক্কে গরিবাত্যা, কোচপেনেই মাষ্টরুনে মাজর পর মাজ পর্বোয়াউনরে পড়ান তেঙা (বেতন) নেই গরি। এ সেরে বেজাল বাজে দ্যুন ঘর যুদ্ধ মৈতৈ, বিষ্ণুপ্রিয়া আ পাঙন (মণিপুরি মুসলিম) জাত্তুনরে। লাম্বা সময় আইনলোই যুদ্ধ গরানা পর থুম অয়্যা গৌহটি হাইকোর্ট আ ভারদত সুপ্রিম কোর্টর। ২০০৬ সালত ৬ মার্চ সুপ্রিম কোর্টর এক যুগান্তকারী ডিঙিরিলোই “বিষ্ণুপ্রিয়া মণিপুরি” নাঙে জনম দুগী ভাজাআনরে রেয্যা গজি লোই। (তত্ত্ব: ফেসবুক)

ও বাপ-ভেই, মা-বোন লক! সরকায্যা এস্যে আমারে ভারী হ্মঅদ কোচপেনেই মা’ ভাচ্ছোই লেঘা-পড়া গরিবার জু গরি ন’ দে। তুমি দেঘর, বুজি পারর নানাঙ প্রসাশনিক জটিল। বই এয বেগে ন পেই। মাষ্টর নেই আ নানাঙ কিজু। নিজ ধাবে, নিজর গরজে আমাত্তুন আমা ভাচ্ছোই লেঘা শিঘা পরিব। এ বজর যুনি চিঝিদাগীরে ন’ শেঘেই এযেত্তে বজর ওয়ানত গেলে আর আগাত্যাত পরিবাক। সিত্যাই ম’ কুজোলী যে যেংঙি পারে, সময় কু’ধরি ধরি আমাত্তুন আমন শিঘ শিঘানা সাত কাম। সক্যে দেজ ন’ থেলেয়ু চাঙমা জাত হিজেবে পিত্তিমীত যে অন জাগাত বাজি থেবং।


দাঙগু ইনজেব চাঙমা, দাঙর কাবিদ্যাঙ, চাঙমা সাহিত্য বাহ্

LEAVE A REPLY

Please enter your comment!
Please enter your name here