তিদি উধি ( চাকমা কবিতা )

0
28

তিদি উধি

আলোময় চাকমা


মনত্ বানি নুও রং,
বুগোত্ বানি নুও গং,
তিদিউধি বোজেখ্যে হের-পদনা ধক্।
ছাহবি নেজেই য়েলেমারি পিত্থিমী।
নুও হরদ্ নুও ঢেলাত্ ফুদোদোক্ ফুল্!
দোল্ ওক্ স্বর্গরেজ্য সান্,
“চম্পকনগর” আমা হিল্ চাদিগাং।

তিদিউধি নুও গঙেঁ,
ছিদি পুড়ি ছড়া-গাঙে।
আমি এগোবো রাজা বিজয়গিরি!
মুকপাত্তি বুগোপাদা সেনাপুতি রাধাঁমন্!
জলগাঞ্জা বুনিয়ে এগোবো ধনপুদি।
বুনিবোং রাধাঁমন’ হবঙান্।
সেনে পারি নুওগুরি,
বানেই তুলি আমা হিল চাদিগাং।

মোন্-মুড়ো জুমচাপ্,
যিদু ঝুড়োদন্ দুখ্যা মা-বাপ্!
হন্যাঁ দের বুক্ বানি ;
আজু নেই, নানু নেই গঙাঁদন্ জিংহানী!
তরাদন্ পরানান্ ধারাদীয়োল্ চোঘোপানি!
আমি হি ন’ পারি?
সে আদামান্….
“ধনপাতা” সান্ ;
নাহি ন’ পারি……
চম্পকনগর বানেবার,
আমা হিল চাদিগাং।

ঝিলিলানিত্ পেরাগ গুরি,
এজনা, ঝড়ফুদো ওই ঝুড়ি পুড়ি,
হরানে শুঘেযিয়া মুরিযিয়া ছড়ানিত্।
গাদত্তুন্ নিঘোলি এত্তোক্ মাছ-কাঙাঁড়া।
নুন্যেশীলো কুয়োবো ভুরি উদোক্ পহন্ পানিয়ে।
চান্দোবী আঝোক্ ;
নীলংবী গাদোক্ ;
ম্যেয়েবী, ছ্যেয়েবী, রাধাঁমন্-ধনপুদি….।
জাদর বিজগ্, লেঘা-পড়া উত্তিপুত্তি।
বাজে রাগেই নানাগান্,
তিদিউধো সমাজ্যা-সমারী,
ফিরে আনি “চম্পকনগর” ;
ধুরি রাগে আমা হিল চাদিগাং।


২৩/০১/২০১৬
★ধনপাতা – যে জাগানত্ রাধাঁমন্ ধনপুদি দাঘী জন্মেয়ন্ (শুনোহধা)।

LEAVE A REPLY

Please enter your comment!
Please enter your name here