স্বমনানি ( চাকমা কবিতা )

0
51

স্বমনানি

আলোময় চাকমা


স্বমনানি ভজ যায় স্বমনত,
ন’ মেলে পাগোর, মিলেযায় দ্বি চোগোত।
পথ ওল ওই আঝি যায় আঝানি,
ফিরি আর ন’ এজে এ বুগোত।

অহেজর অনালে পোড়ি থায় এন অক্তত,
ঝুড়ি পুজ্যা ফাগুনোর মরা পাদানি।
সেনগোরি পোড়ি থায় স্বমন রেজ্যোত,
জঞ্জালুক রাঙাঁ-য়েল ভাবনার মর হধানি।

আগা নেই, গড়া নেই, ছিনে সুধো মু নেই,
নেই নেই সে হধানির থুম।
হেনে দেগানা স্বমনর বার্গী পেক্কুন,
যুনি আর’ ভাঙী যায় দ্বি চোগোত্তু কাজাঘুম।

শিমেত্তুলো সান উড়ি যান,
মনর আগাজত সুঘর বার্গীউন।
ন’ এজন ফিরি, বানাহ যান উড়ি,
মন মাদিত ফেলে যান ছাবাউন।

উরঘুমো চোগে নীজিরেত বাচ্ছে থাং,
দেঘিম ভিলি সুখ স্বমনানি।
দরসাল্যো মন ন’ পারি ফুরি,
স্বমনর সুখ তারাউন ফিরি যান কানি কানি।

চিদংয়ে আরেয়্যে সাধক শিবচরনরে,
মুজোঙোত্তুন দ্বিবা চোখ হাদিনে।
নীজিরেত মুই আরেয়্যং সুখ স্বমনানি,
থাদারত জাগি, দ্বিবা চোখ হুলিনে।


০৪/০৩/২০১৮

LEAVE A REPLY

Please enter your comment!
Please enter your name here