ঈর চে চে… ( চাকমা কবিতা )

0
30

ঈর চে চে…

আলোময় চাকমা


নাকও বাধি আক্কলও বাধি,
হধানি চেলে লাম্বা।
থান ন’ পের অন্য জাদে,
হিঙোঁরী চাধন চাম্বা।

রুবে – রঙেঁ হরাপ নয়,
অলে হি অব’ মনানি।
অন্য জাত্তোই ললজপলজ,
হে পারি জাদর মাধানি।

বায়াঁলে হধাক হাপ্পো জাদ,
আমি হোলেই জুম্মো।
আড়ন্দি রাজার রেজ্যত ইক্কে,
পড়া হোবাল্যে লুম্বো।

দ্বি নেক – মোগত্তুন ইক্কো পুও,
ওই যের আগা সুজো।
ধাদে ন’ কুলোয় পিত্থীমি,
ক’লে উজো উজো…।

হধানি হোইধি জবর জবর,
পুণ্ডিক চেদেই বেক্কুনে।
বংশ লুগেবার ফুগুদি হানাদি,
পহর দেগদন চোখকুনে।

পেদেরা পেদোরি মুড়ো – মুড়ি,
কুজুম বুদি থেই।
হাঙাঁড়া হক পা জুম কাবিনে,
জনম কাদেবার চেই।

কামত যাদে ভাত মজাত্তুন,
ডাঁঙর ধুন্দো মজা’ব্যুও।
হোড়োল্যা তারা। হেবার ছহলাত,
আমি অলং পেজা’ব্যুও।

বাপ্পো চৌধুরী, পুওবো কাত্,
ঝি’বো অলদে নোনিয়ে।
বুড়ো বুড়িয়ে থান পান,
কমলে কমলে বৌ যিয়ে।

আড়ি দেড়আড়ি জুম কাবিনে,
(যুনি) ভাল লক্ষন দেই।
শুউরি উন্দুর ধানঅ গলা’ত,
উত্তে পারা পেই।

সিত্তুন যুনি আর’ বাবু ওয়োই,
ইদোত ন’ তুলি জাত।
লুড়ো শুগোর চালত উধি,
উল্লো বিজিই দাত।

এদক এদক গম ফাজালোই,
কেনে টিগানা।
রাজার ঘরত সাত আলজিত্তুন,
হেবং হাজানা।


১৯/০১/২০১৮

LEAVE A REPLY

Please enter your comment!
Please enter your name here